Kumin March ni 9-a ram kang venna kawnga mahni nunna chan huama beitu Pu Lalduha, kum 66, Tlungvel khua chu vawiin khan Environment & Forests Minister, Sub-Committee on Fire Prevention Chairman ni bawk Pu Lalrinmawia Ralte chuan Durtlang Damdawiin ah a kan.
Kan ram thing leh mau te leh nungchate humhalh duh vanga hmanrua pawh nei lo chunga kang a thelhna avanga hliam tuar mek Pu Lalduha inpekna chu a fakawmin a ropui a. Mizoram sorkar leh Forest Department pawhin a in pekna thinlung hi a ngaihlu a ni tiin Pu Lalrinmawia Ralte chuan Pu Lalduha chetdan hi mitinin entawn thei ila nungcha te, thing leh mau te humhalhin kan ram boruak a lo thianghlima tuihna te a lo tam theihna turin mitinin tan kan lak a ngai a ni, a ti.
Pu Lalduha leh a fanu hian kumin March ni 9 khan lo an hal a, lo an hal hma hian vah bak a kan loh nan tiin meilam an sial thlap a, lo an hal ni hian hmun dang a kan kai loh nan theihtawp chhuahin a fanu nen kang an veng a. An veng hneh tura an inngaih hnu-ah thli thawin mei rawn chhem alh leh thutin, an vah bak ram a tikang thei mai dawna hriain nasa takin tan an la ta a ni. Chutia theihtawp chhuaha kang a thelh lai chuan a chempui ken a thlauh palh ta hlauh mai a, hmanraw dang ken nei lo mahse, amah pawh inngaihtuah hman lovin kutlawngin mei chu benhlum tumin a bei ta a, hetia a beih lai hian a fanu chuan a lo au tuarh tuarh a, chuti chung chuan ram a kan ai chuan tiin a taksa hmun hrang hrangah hliam awm tawh mahse, ama nunna thapin a bei ta zel a, hun engemaw chen a beih hnuah a thelh mit thei ta a ni. Pu Lalduha taksa hmun hrang hranga hliam awm zingah hian a kut a kang chhe zual a. Tunah hian Presbyterian Hospital, Durtlangah enkawl mek a ni a. A kut zungtangte hi Doctor te chuan tan a ngai maithei niin an sawi.
Heti taka ramngaw humhalha beitu leh kangmei laka venhim tlat duhtu hi Environment & Forest Department chuan a ngai hluin, a vanduaina hi a tuarpui tak zet a, midangte entawn tlaka a hnathawh avang hian vawiin khan Pu Lalrinmawia Ralte chuan amah enkawlna Presbyterian Hospital, Durtlangah kanin Rs. 50,000/- (cheng singnga) a hlan a. Minister hi Pu Rosiama Vanchhawng, Addl. PCCF leh officer thenkhatin an tawiawm a ni.
