Nimin chawhnu khan EF&CC Department hnuaia thawk officer-te chuan PCCF & Principal Secretary Pu Lalram Thanga, IFS ho in EF&CC Department Minister thar Pu TJ Lalnuntluanga chu lawmna leh in hmelhriattirna neiin, a office chamber New Secretariat Complex, Khatla-ah thingpui in hona an neih pui.

 He inlawmna meeting-ah hian PCCF & Principal Secretary Lalram Thanga chuan EF&CC Department kalphung tlangpui leh officer te hmelhriat tirna a nei a. EF&CC Department hnuaia afforestation leh conservation programme hrang hrang kalpui mek te leh fund dinhmun tlangpui a sawi lang a, hei bakah hian EF&CC Department in tun dinhmun a harsatna an neih hrang hrang Staff indaih lohna an tawh mek te pawh a sawi lang bawk.

EF&CC Department officer te hian an Minister thar chu duhsakna hlan in a kaihhruaina hnuaiah ramngaw leh nungcha humhalh kawngah Department chuan chak taka hma an sawn an beisei thu an tarlang.

EF&CC Department Minister thar Pu TJ Lalnuntluanga pawhin Department hotute duhsakna a hlan a. Minister thar chuan Department hnuaia scheme hrang hrangte chak taka kalpui anih theih nan Central lamah chak taka bawhzui a tum thu a tarlang a. Hei bakah hian Sorkar Reserve Forests leh Community Reserve chereu mek te ti ngaw leh tur a tan lak a tul thu a tarlang bawk. Hei bakah hian ram ngaw leh nungcha humhalh kawngah Sorkar Department dangte, NGO hrang hrang leh mipuite nen thawh hona tha leh zual nei tur a tanlak a tum thu a tarlang bawk.