2878/2025-2026

Dated Aizawl, the 12th January, 2026 : Vawiin khan Environment Forest & Climate Change Minister Pu Lalthansanga chuan Forester training batch 24-na Convocation programme chu Forester Training School Conference Hall, Bethlehem Vengthlangah khuallian niin a hmanpui a, Principal Chief Conservator of Forests Pu Rajeev Kumar Tiwari chu khualzahawm a ni.

Minister Pu Lalthansanga chuan vawiina Forester training zote lawmpuina thu sawiin an training chhunga an thil zir zawng zawngte hre renga, an hnathawhna-a tangkai taka hmang zui turin a chah a. Mipui hma-ah chuan Field Staff-te hi Forest Department hmel siam tute an nih avangin khawtlang leh pawl hrang hrangte tha taka thawhpui turin a chah bawk a. Forest Department leh mipuite karah thawhhona tha a awm theih nan kan ramngaw, thing leh mau, nungchate venhimna leh humhalh kawngah zau zawka mipuite thleng phak inhrilhhriatna (awareness) chi hrang hrang huaihawt a pawimawh thu a sawi a. Ram leh hnam tan an tha leh zung piah lamah an thiamna leh theihna kawngah theihtawp chhual zel turin trainee-te chu duhsakna a hlan a ni.

PCCF Pu Rajeev Kumar Tiwari pawhin he hunah hian thusawiin Forester Training School-a hotuten taima tak leh phur taka trainee-te zirtirna an pe chu lawmawm a tih thu a sawi a. An training chhunga an thil zir zawng zawngte vawng renga, an hnathawhna-ah mipuite nen thawhhona tha tak nei turin trainee-te chu a chah a ni.

Forest Training School hi November, 1974-a din niin, Forester 336 leh Forest Guard 643-in he school atang hian training an zo tawh a. Forester batch 24 na-ah hian trainee 12 awmin,  honors-in an pass veka, an training chhung hian Mizoram chhung leh Mizoram pawna National Park leh Forest Division hrang hrangte tlawhin study tour an nei a ni.

Vawiin Convocation programme-ah hian Pi Aarti Chaudhary, CCF (RTM) chuan kalkhawmte lawmna thu a sawi a, Pi Vanlalnunpuii Hmar, Principal, FTS hnen atangin training report ngaihthlak a ni a, Pu Agni Mitra, CF (P&D) chuan lawmthu sawiin hun a khar a ni. 

Minister Pu Lalthansanga chuan a hnuaia tarlan trainee tithazualte hnenah lawmman a hlan bawk a ni.

1. PCCF Gold Medal for Topper with Honours - H. Lalnunfela

2. Chief Wildlife Warden Silver Medal for highest score in Wildlife Management - H. Lalnunfela

3. Chief Conservator of Forests Silver Medal for highest score in Silviculture - C. Lalruatfela

4. Chief Conservator of Forests Silver Medal for highest score in Forest Protection & Law - Lalringzuala

5. Addl. PCCF Gold Medal for Best Conduct - Ricky Lalhmachhuana