3579/2024-2025

Champhai, 17th December 2024: Vawiin khan Environment Forest & Climate Change (EF&CC) changtu Minister Pu Lalthansanga chuan Conservator of Forest (Eastern Circle) Auditorium, Champhai Bethel Veng leh Interpretation Center, Botanical Garden, Zotlang Hmun hlui a mi chu a hawng a. Champhai South bialtu MLA Lt. Col. Clement Lalhmingthanga chuan khual zahawm niin he hun hi a hmanpui bawk a ni.

Hawnna inkhawmah hian Pu Lalthansanga chuan Conservator of Forest (Eastern Circle) in Auditorium leh Interpretation Centre-a nei thei chu lawmawm a tih thu a sawi a. Hruaitu hmasa te hmalakna fakawm a tih thu sawiin, hmunhma enkawl kawngah ṭan lak a ṭul tih a sawi bawk.

Pu Lalthansanga chuan ramngaw chu ram hnuk pawimawh tak pakhat a ni tiin, ramngaw humhalh tura khauh taka kal hi ram venhima kawng chi khat a ni, a ti a. Environment Minister chuan ṭhal tirah lui te an kang der tawh thu leh tui indaih lohna a nasat tial tial tur thu sawiin, tuihna humhalh chu chona lian tak a ni, a ti a. Ramngaw humhalh kawngah hian hmasawnna kaihhnawih pawh ni se, EF&CC phalna lo chuan kutthlak a theih tawh dawn tih sawiin, Minister chuan “Kan ram a kal dik dawn chuan dan a lal a tul a ni,” a ti.

EF&CC Minister chuan Environment & Forest Department chu mipui tana ding an nih thu sawiin, an nihna hriat chian loh avanga hnawk emaw an ti ṭhin chu pawi a tih thu a sawi a. Forest kaihhnawih dan tam ber chu State Level-a thutlukna siam theih a ni lo a, sawrkar laipui leh ram pum huap thil anih avangin mipuite hriatthiamna a ngen a ni.

Sericulture Minister ni bawk Pu Lalthansanga chuan Mizoram sawrkarin malsawmna tam tak a dawng tih sawiin, a vawikhat nan Sericulture Conclave Mizoramah neih a nih thu leh cheng vaibelchhe 13 zet pek an nih thu a tarlang a. Rubber Board of India hruaitute leh CM hmalakna zarah Chief Minister’s Rubber Mission tlangzarh q ni a, he scheme tihhlawhtlinna tur hian cheng vaibelchhe 27 ruahman a ni tih a tarlang bawk a ni.

Khual zahawm Champhai South bialtu MLA Lt Col.Lalhmingthanga pawhin thu sawiin, tui thianghlim awm zelna turin tuihna leh ramngawte humhalh a, ramngaw siam belh zel a ngai a ni, a ti a. Sawrkarin Krismas leh Kumthar vuakveta halpuah leh halmawi a khapna thupek chu zawm ṭheuh turin mitin te a ngen nghal bawk a ni.

Conservator of Forest (Eastern Circle) Auditorium hawnna inkhawm hi EF&CC Complex Champhai Bethel Vengah neih a ni a. Pu AK Biswal, Principal Chief Conservator of Forest (PCCF) chuan he hun hi a kaihruai a. Pu Lalbiakchama Chawngthu, DFO Champhai chuan technical report pein, Pu Pee Lee Ete, Conservator of Forest (Eastern Circle) chuan lawmthu sawiin hun a khar a ni.

Interpretation Center, Botanical Garden, Zotlang Hmun hlui hawnna hi Botanical Garden ah neih a ni a. Pu K. Lalhmangaihzuala, Jt. Secretary, EF&CC chuan he hun hi a kaihruai a. Pu Lalbiakchama Chawngthu, DFO Champhai chuan technical report pein, Pu Pee Lee Ete, Conservator of Forest (Eastern Circle) chuan lawmthu sawiin hun a khar a ni.

Conservator of Forest (Eastern Circle) Auditorium, Environmental Forest & Climate Change Complex, Champhai Bethel Venga mi hi Maintenance of Forest Fund 2023-24 hnuaia sum cheng nuai 44 hmanga sak a ni. July ni 10, 2024 khan sak ṭan niin, December ni 12, 2024 khan sak zawh a ni. A building hi a dung feet 72, a vang feet 39 niin square feet 3,528 a zau a ni a, Auditorium, Meeting Room leh inthiarna te a awm a. Training, Awareness Campaign leh meeting neihna tura ruahman a ni.

Interpretation Center, Botanical Garden, Zotlang Hmun hlui a mi hi Maintenance of Forest 2023-24 hnuai sum cheng nuai 40 hmanga sak a ni a. Zotlang Botanical Garden hi June ni 2, 2022 khan a lungphum phum a lo ni tawh a ni.

July ni 1, 2024 khan sak ṭan a ni a, December ni 10, 2024 khan sak zawh a ni.  Building hi a dung feet 50 a sei, a vang feet 40 niin, square feet 200 a zau a ni. Interpretation Center ah hian Conference Hall, Mini Museum, office leh inthiarna te a awm a. Department hotute chuan fur ruah tui a tam avang leh a sakna hmun hi tlang chhip a awm anih avangin, bungraw lak leh phurh kawngah harsatna tam tak an tawk tih sawiin, tluang taka sak zawh a ni ta chu an lawm thu an sawi bawk a ni.