3578/2024-2025

2024 Pawltlak thla ni 17: Vawiin khan Lunglei High Powered Committee (HPC) Vice Chairman, Lunglei North bialtu MLA Pu V. Malsawmtluanga chuan Lunglei Government College Auditorium-ah Loroto Play School kum 10 tlin lawmna hun chu Khuallian niin a hmanpui.

Pu V. Malsawmtluanga chuan Loroto Play School, Lunglei kum 10 tlinna lungphun hawngin, thu a sawi a. Loroto Play School, Lungleiin kum 10 an tling ta leh a ṭhang zawnga an kal zel thei chu a lawmpui thu sawiin, zirna ṭha a awm theih nana Loroto Foundation leh zirtirtute ṭhahnem ngaihna leh inpekna chu chhuanawm a tih thu a sawi a. Sawrkarin private sikul ṭha a theih ang anga puihbawm a tum tih sawiin, HPC sum aṭangin HATIM tan tuizem siamsak a nih thu leh a tahtawla hma lak zel tum a nih thu te, Loroto Play School tan pawh ruahmanna siam a nih tur thu te a sawi a. Zirlaite chu an duh duh ni thei tura hun remchang an la neih avanga an nihlawh thu hrilhin, tun aṭanga tum fel tak nei tur te, hlawhtlin nan thuawihna a pawimawh avangin an nu leh pa leh zirtirtute thu awih tur leh Pathian hre chunga lehkha zir tur te'n a fuih a. Thawk rimte tan eng kawng pawh ei zawnna tling a nih thu sawiin, an tun hun hman danin an hma hun leh Mizoram hma hun a hril dawn avangin an zirlaiah theih tawp chhuah a, uluk taka nun hmang turin zirlaite chu a fuih bawk.

Loroto Play School kum 10 tlin lawmna hunah hian Loroto Play School neitu, thawktu leh zirlaite, thawktu hlui leh zirlai nu leh pate leh sawm bik mi ṭhenkhatte an tel a. Baptist Church of Mizoram (BCM) Serkawn Pastor Bial bialtu Rev. JC Vanlalluaia'n hunserh a hmang a. School Founder leh Director Pu HP Lalremtluanga chuan Loroto Play School a din chhoh dan leh kum 10 chhunga sikul zinkawng tlangpui a sawi a. Zirlaite'n hnam lam (chheih lam leh cheraw) entirin, School Choir te'n hla an rem a. Class-VII zirlai Junia Lalrempuii chuan Loroto Play School puala thu phuah, "Thiam tin thaina run" tih chhamin, Class-V zirlai Lalhrediki Hnamte chuan zaiin kal khawmte a awi a. Zirlai naupang (Nursery aṭanga Class-VIII zirlai)-te aṭangin item chi hrang hrang - lem chan, zai, lam leh thuam entir te thlir ho niin, Principal Pu Lalhlimpuia Pachuau chuan lawm thu sawiin hun a khar a ni.

Loroto Play School hi kum 2014 April ni 1 khan zirlai 12 leh zirtirtu 3 nen Nursery aṭanga bul ṭan a ni a. Kum tin class hawn belh zelin, tun dinhmunah Nursery aṭanga Class-VIII thleng zirna a awm a. Kum 2024-2025 session-ah zirlai 513 neiin, zirtirtu leh staff 33 bakah, zirlai naupang hruai leh thlahna lirthei khalhtu transport staff 29, an zavaiin thawktu 62 an awm mek a ni.