4702/2025-2026

Dated Aizawl, the 5th March, 2026 : Vawiin khan Mizoram Pollution Control Board (MPCB) hnuaia Mizoram Environmental Information, Awareness, Capacity Building and Livelihood Programme (EIACP) Hub buatsaih Green Skill Development Programme (GSDP) training ‘Certificate Course in Waste Optimization Professional’ kharna hun chu RB Mc Cable Hall, Aijal Club-ah hman a ni a. He hun hi Pu Lalthansanga, Minister, Environment Forest & Climate Change (EF&CC) Department chuan khuallian niin a hmanpui.

Khuallian Pu Lalthansanga chuan Mizoramah ramngaw (forest cover) a tam bakah open forest a tam avangin sawrkar laipui atanga kan sum hmuh tur pawh a tam phah thu tarlangin, kan ramngaw leh nungchate humhalha, Mizoram hi ram fai leh thianglhima kan siam a pawimawh thu a sawi a. Kan ram faina leh boruak thianghlim hi khualzin hiptu lian tak a ni, a ti a. Bawlhhlawh atanga thil tangkai siamchhuah (Waste Optimization) hi thil pawimawh tak a nih thu sawiin, bawlhhlawh paih mai lova, thil tha leh tangkai tak tak siamchhuah kawnga hma lain, vawiina trainee zirchhuakte pawhin hemi kawngah hian hna an insiam thei dawn a ni, a ti a. Minister chuan training chhuak mi 20-te leh Resource Person mi 22-te hnenah Certificate hlanin, an kal lehzelna turah duhsakna a hlan a. Trainee-te chu an zir chhuah thiamnate eizawn nana hmang tangkai ngei turin a fuih bawk a ni.

GSDP training hi November ni 24, 2025 khan hawn tan niin tluang takin March ni 5, 2026 hian zawh fel a ni. He training kharna hi Pu Liankima Lailung, Chairman, MPCB chuan a kaihruai a, Pu Benjamin Lalnunsanga Colney, Programme Officer, Mizoram EIACP Hub chuan training chungchang report chipchiar takin a pe a, Resource Person leh Trainee-te aiawha thu sawi awm bawkin, Pu C. Lalduhawma, Member Secretary, MPCB chuan fuihna thuchah a sawi bawk a ni.

GSDP hnuaia training chhuakte chu lehkhathiam, graduate hna nghet nei lo emaw pawl 12 emaw pass chin, bawlhhlawh sâwngbâwl kaihhnawih lama kum 3 tal tawnhriat nei tawh an ni a, Resource Person atan hian Mizorama mithiam bikte an ruai a ni.

GSDP hi Skill India Mission leh Ministry of Environment, Forests & Climate Change (MoEF&CC) tangkawpin India ram State hrang hrangah a chhawpchhuak a, he programme hnuaiah hian lehkhathiam hna nei lo kum 18 chung lam tan Course hrang hrangah Training buatsaih niin, Mizoramah chuan Mizoram EIACP Hub-ten training hi an kalpui a ni.