1494/2022-2023
Champhai, the 8th August, 2022: Ram hmasawnna hrang hrang buaipuia New Delhi-a cham mek, EF&CC Minister, Pu T.J. Lalnuntluanga chuan kar hmasa Zirtawp zan khan Union Tourism, Culture Minister Pu G. Kishan Reddy, Development of North Eastern Region of India (DoNER) Minister ni bawk chu New Delhi-a a chenna inah a hmu a, Champhai Tlangsam hmun hluia Tagore Cultural Complex din tum chungchang leh thil pawimawh dangte a sawipui.

EF&CC Minister, Pu T.J. Lalnuntluanga chuan Champhai Tlangsam hmun hluia Tagore Cultural Complex din tum chungchangah hian Sawrkar thar a lo pian hlim phat atangin hma lak nghal a ni tih sawiin, hemi atan hian Sawrkar laipui pawh vawi duai lo dawr a ni tawh a ni, a ti a. Hripui leh harsatna hrang hrang avanga a hlawhtlinna hmuh a la nih mai loh avang leh Union Minister hnen atanga thudawnin, Tagore Cultural Complex din tum chungchang chu National Appraisal Committee (NAC) in a ngaihtuah tur thu January ni 17, 2022 khan lehkha hmanga rawn hriattir a nih thu tarlangin, chak zawka hma laksak turin Union Minister chu a ngen a. Pu G. Kishan Reddy pawhin Tagore Cultural Complex din tum chungchangah theihtawp chhuaha hma lakpui a inhuam thu leh a tul anga hma lak nghal a nih tur thu Forest Minister hi a hrilh a ni.

EF&CC Minister hi Additional Resident Commissioner, Pu Alexander V. Chongthu, MCS; Pu Pee Lee Ete, IFS, Conservator of Forest (Eastern Circle), EF&CC Department leh Pu Thomas Lalrammawia, MJS, Deputy Secretary, Law & Judicial Department ten an tawiawm a ni.