3953/2022-2023

Aizawl The 23rd March 2023: Vawiin khan Pu TJ Lalnuntluanga, Minister, Environment, Forests & Climate Change Department changtu chuan New Secretariat Complex Road-a Chief Wildlife Warden Office a hawng. Hawnna programme urhsun tak hman zawh a nih hnu hian Chief Wildlife Warden Office Conference Hall-ah EF&CC hotu rual te nen meeting an nei nghal a. He meeting-ah hian Department hmalakna hrang hrang thlir ho niin an hmachhawp te leh hmalakna tur ruahmanna an siam te an sawi ho a ni.

Hawnna thu sawiin Minister Pu TJ Lalnuntluanga chuan he building sak puitlin a nih theih nana bul tan tute, tha leh zung lo thawh tawh tu zawng zawng te hnenah lawmthu a sawi a, “Department-in hma kan sawn zel a, kan mi hmasa Minister te, officer te theihtawp a hma an lo lak tawh naah lawmthu ka sawi a ni,” a ti. Minister chuan EF&CC hnuaia thawk tute zawng zawng an thawhrimna a fak a, hma an sawn zel theihna tura tan la lehzual turin a fuih a. Department leh ramin hma a sawn zel dawn tih hriaa, beiseina thar nei turin thawktute leh mipuite a sawm bawk a ni.

EF&CC Minister Pu TJ Lalnuntluanga’n a hawn tak Chief Wildlife Warden Office hi kum 2016-17 sawrkar kum khan sak tan a ni a. He Office hi official-a hawn a nih hmain an sak zawh chin apiang sawrkar sum remchem nan luah nghal zel a ni a, tunah hian a pum puia luah theih tura peihfel a ni ta a ni.

Hawnna programme hman zawh hnu hian meeting neih chhunzawm a ni a. Meeting kaihruaitu Pu RK Singh, PCCF leh Head of Forests Force ni bawk chuan EF&CC Minister Pu TJ Lalnuntluanga hova meeting an neih theih avanga lawm thu sawiin tih tak zeta department hmalakna hriatpuia ngaihsaktu Minister an nei chu a vanneihthlak hle a ni, a ti.

He meeting-ah hian Green India Mission(GIM) chungchang sawiho a ni a. He mission hnuaia Agro-Forestry kalpui mek chu kuthnathawktuten nasa zawka an hman tangkai theih dan tur te ngaihtuah ho a ni a. JICA Project hmachhawp chungchang te, ram kang a lo tlem theih nana hma lak dan tur te, Forest Clearance leh thil danga dan bawhchhiatna awm thei chungchang bakah thil dang pawimawh tak tak te meeting-ah hian ngaihtuah ho a ni bawk.

All India Forest Sports Meet, March ni 10-14, 2023 chhunga Tau Devi Lal Sports Complex, Panchkula, Haryana-a neih zawh taka Mizoram aiawha kal mi 16 te hlawhtlinna pawh Pu TJ Lalnuntluanga hian a lawmpui nghal a. He sports meet-ah hian India ram state leh institution hrang hrang atangin Team 37 lai an tel a, Mizoram Forest aiawha kal mi 16 te chuan Gold Medal - 3, Silver Medal - 5 leh Bronze Medal - 4 an la a, a pumpuiah point 42 hmu-in 14-na hial an ni. He Sports Meet-a kalte hi Pu RK Singh, PCCF leh Pu PC Laltanpuia, DCF(Hqrs.) ten an ho a ni.

Vawiin programme ah hian Mizoram hmun hrang hrang atangin EF&CC Department hnuaia officer-te an kalkhawm a ni.