3952/2022-2023

Dated Serchhip,the 23rd March, 2023: Vawiin khan Er. Lalrinawma, Minister Social Welfare etc. chuan Tawitlang Group YMA inkhawmpui leh Golden Jubilee Lungpho a neih chu khuallian niin a hman pui.

Khuallian chuan thusawiin Tawitlang Group YMA-in Golden Jubilee hial lawm theia an awm hi a lawmawm hle a , YMA chu pawl zahawm leh thianghlim hnam dangte pawhin min hriat thinna, ram leh khawtlang inrelbawlna ah mawhphurhna thui tak nei anih avangin kan ram leh hnam tan a hlu em em a ni. Midangte tanpui leh zonun zemawi chu chhunzawm zel ila, hnam ziarang, tawng leh tihdanphungte zahpui lovin i uar zel ang u, tiin kalkhawmte a chah a ni. Kan mi chhuanawm tak tak te chanchin leh an sulhnute kan ngaihhlut thiam zel a pawimawh a, Pathianin hnam, sakhua leh ram min pe a, hman atangin chu chu min thlahtuten tha takin an humhalh a, vawiinah pawh tha taka kan humhalh zel a tul a ni. Pathianin ram leh hnam min pek hi midangin min humhalh sak dawn lova, mimal leh pawl han humhalhtu tur bik an awm chuang lo, mahni theuh hi kan pawimawh a ni, tiin ram leh hnamhumhalh pawimawhzia a tarlang bawk. Intodelh tum ila, eizawnna leh hnathawhna tinah ram leh hnam hmangaihna rilru pu chunga thawh a tul thu sawiin, eng hna pawh thawk ila hna sang bik a awm lova, thawktu azirin a zahawmina zahawmlo mai a ni a ti a. Tawitlang group YMA members te chu zonun zemawi tlawmngaihna, aia upa zahthiam, tanpui ngaite tanpuitu nih tum zel tur leh ruihlo lakah fihlim zel turin a sawm a ni.

Tawitlang Group YMA Inkhawmpui hi Ni 21-23.03.2023 chhung hman niin Thupuiah "Ram leh hnam humhalh"  tih chu hman a ni a, Prof. Lalnuntluanga, Gen. Secretary CYMA leh Sub-Hqrs YMA, Serchhip hruaitute pawhin he hun hi an hmanpui a, vawiin programah hian Branch hrang hrang ten cultural item an entir a, Volleyball intihsiakna neih a ni bawk a ni.