161/2023-2024

Champhai, the 20th April, 2023: Environment, Forest & Climate Change (EF&CC) Minister Pu T.J. Lalnuntluanga chuan vawiin chawhma khan Sub-Hqrs. YMA (SYMA) Champhai inkhawmpui vawi 8-na, 'Ram leh hnam humhalh' tih thupui hmanga Vanhnuailiana Hall, Ruantlanga neih chu khuallian niin a hmanpui.

Khuallian EF&CC Minister Pu T.J. Lalnuntluanga chuan YMA member-te chu zoun ze mawi tak chawinungtu leh a nuam lai chauh nilo, hreawm lai pawha YMA khaidingtu nih tum turin a fuih a. YMA chu Pathian min pek pawl ropui tak, Zofate tana pawl hlu tak, tanpui ngai leh chhumchhiate chhawmdawla buaipui thintu, chhiat that nikhuaa theihtawp chhuah thintu hnam dangte neih ve loh a nih thu a sawi a. Hnam zia leh nunphung pholangtu leh chhawmnung tlattu a ni chu ngaihsanawm a tih thu sawiin, thlei bik nei lova mipuite hrut rualtu a ni leh khawtlang mipuite thlamuan fotu a ni thin chu fakawm a ti a. Pawl ngaihdan ni lova tute emaw ngaihdan ang chauha a kal mai loh nan leh, a thiltum anga a kalzel theih nana theihtawp chhuaha ven tlan a pawimawh thu sawiin, zonun zemawi tlawmngaihna leh adangte chhawmnun zel kawngah kan zavaia tanrual a ngai a ni, a ti a. Thenawm ram buai avanga baihvai taka awm raltlan leh Covid-19 hrileng buaipui kawnga YMA in theihtawp a chhuah chu fakawm a tih thu a sawi a. Mahni intodelh chu zahawmna leh huaisenna a nih thu sawiin, ram hmasawn nan hlemhletna leh dan lova thil tih do tlan te, ngaihtuahna dik leh hrisel neihte chu a pawimawh hmasak thu a sawi bawk.

YMA member-te chu mahni intodelh tum tlat tur leh, mahni kutkea ding thei tura taimak chhuah turte, hlemhletnain a tihbuai ve loh mi nih tum turtea chahin, kut tling lova sum lakluh leh midangte atanga thil dawng tur ringawta indah lo turtein a fuih a. Chhungkua, ram leh hnam tana tih theih angte phak tawk chhuaha puitlin thei tura ngaihtuahna dik leh hrisel neih hmasak a pawimawh thu sawiin, kum sangbi tel lo changkang tawh hnam dang leh ram dangte nena intehkhin mai lova, an dinhmun ang leh a aia sang zawk thleng thei tura taima leh rinawm taka thawk tura ngaihtuahna seng zawk turin thalaite a sawm a. Midangte nun dan leh thil tihah buai mai lova, rualelna dik nena hmalam pan a pawimawh thu sawiin, ngaihtuahna leh rualelna dik kan neih phawt chuan hmasawnna in a umzui dawn a ni, a ti a. Teirei peihna leh dawhtheihna neih kan mamawh a ni, a ti bawk.

EF&CC Minister chuan fur ruahtui tlak hmain NH-06 siam hna, dan zamte tha taka zawm chunga zo hman tura tanlak a nih thu sawiin, mipuite nghahhlelh em em kawngpui siam kawnga forest clearance buaipui ngaite pawh chak taka bawhzui a nih thu a sawi a. Ngaihdan hrang hrang nei kan ni maithei, amaherawhchu ram hruaitute thawhpui thiam mi leh finchhuah tul huna finchhuah thintu nih kan tum hram hram tur a ni, a ti bawk a. Hmasawnna ruhrel siam kawnga hmalakna hrang hrangte tarlangin, hnam naupang te mah ni ila hmasawnna tam tak kan nei tawh a, hemi chhawmnung zel tur hian tanrual a ngai a, hlemhletna tel lova mahni nih dan ang anga lan ngam kan inhuam tur a ni, a ti bawk a. Tlawmngaihna chu phut let nei lo a nih anga chawilar deuh deuh a tul thu leh inzirtirna tam zawk neih a pawimawh thu a sawi bawk a. Khawvel ram changkang leh hmasawn mek zel karah chhungkua leh khawtlang nun a danglam nasa lutuk leh inpumkhatna a ti chhe thin chu pawi a tih thu sawiin, YMA member kalkhawmte chu nu leh pate leh aia upate thu awiha zahna chang hre turin a fuih a. Inkhawmpui hmangtute chu mahni zawn theuhah zonun zemawi leh hnam ziarang mawi tak takte pholanga midangte tihhmuh leh zirtirtu nih tum theuh turin a chah a ni.

He hun hi Sub-Hqrs. YMA Champhai President Pu F.Lalrinmuana chuan a kaihruai a. Secretary Pu R.Lallawmzuala'n hun hman dan tur tlangpui a tarlang a. Upa TBC Biakthansanga'n hunserh a hman hnuah Pu Robert Zoremtluanga, SEC kaihhruaiin YMA thuthlung sawi rual a ni a. Pu Lalduhthlana, DFO Champhaiin nungcha, tuihna leh ramngaw humhalh chungchang zirtirna a nei a. Chawhnu lamah Central Young Mizo Association (CYMA) hruaitute kaihhruaiin hruaitu thar an thlang a ni.

Sub-Hqrs. YMA Champhai inkhawmpui vawi 8-na hi April thla ni 18-20, 2023 chhung hian 'Ram Leh Hnam Humhalh' tih thupui hmanga neih a ni a. Inkhawmpui chhung hian EF&CC Department, PHE Department, Excise & Narcotics Department leh Samagra Shiksha te'n Department kaihhnawih hrang hrangte zirtirna an pe a. Zai, lam leh program benglut tak takte ngaihthlaka thlir ho niin, hun hlimawm leh hlawkthlak tak hman a ni a. Zanin hian Sub-Hqrs. YMA Champhai inkhawmpui tum 8-na hi a tiak dawn a ni. Nakum hi rorel inkhawm neih kum niin, Sub-Hqrs. Office, Tlangrawt, Champhaiah neih a ni dawn a. Sub-Hqrs. YMA Champhai inkhawmpui vawi 9-na thleng turin Zote Branch YMA, Champhai chu ruat a ni.

Sub-Hqrs. YMA Champhai hi June ni 18, 2008 khan din a ni a. An hnuaiah hian Group pathum; Tuipuiral Group YMA, Vanhnuailiana Group YMA leh Vanapa Group YMA te an awm mek a, heng bakah hian thuthmun Branch 24 an awm mek bawk a ni. Sub-Headquarters YMA, Champhai huam chhungah hian Branch 67 awm mekin YMA member Mipa 22,061 leh Hmeichhia 13,326, an vaiin member 35,387 (Singthum sangnga zathum sawmriat leh pasarih) an awm mek a ni.