4036/2022-2023

Champhai, the 30th March, 2023: Environment, Forest & Climate Change (EF&CC) Minister Pu T.J. Lalnuntluanga chuan vawiin chawhma dar 11 khan Tuipuiral Group YMA inkhawmpui vawi 45-na, Suakliana Hall, Lianpui khuaa neih chu khuallian niin a hmanpui a, he hunah hian East Tuipui bialtu MLA Pu Ramthanmawia, Vice Chairman, Bamboo Link Road Board chu khualzahawm a ni.

Khuallian EF&CC Minister Pu T.J. Lalnuntluanga chuan Tuipuiral Group YMA inkhawmpui lian ber hmanpui tura sawm a ni chu lawmawm a tih thu sawiin, YMA member kalkhawmte khawmpui chibai a buk a. Nungcha, ramngaw leh tuihna humhalh kawngah Department-in theihtawp a chhuah thu sawiin, Tuipuiral huamchhunga Zopui Tlang, Tan Tlang leh Lurh Tlang-a nungcha leh thing leh mau awmte humhalh kawnga hmalak tulna Tuipuiral Group YMA in a hnena an thlen chu a tul anga lo enzui pui a tum thu a sawi a. Thawhhona tha siam tur leh chhawmnung zel tura sawmin, thawhhona tha a awm phawt chuan hmasawnna dik a awm thei thin a ni, a ti a. Biodiversity Management Committee kalpui dante ennawn leh awmze nei zawka kalpui a nih theih nana tanlak tum a nih thu a sawi bawk.

YMA chu Pathian min pek pawl ropui tak leh zofate tana pawl hlu tak, insuihkhawmna kawnga sulsutu pawimawh tak a ni, a ti a. Hnam zia leh nunphung pholangtu leh chhawmnung tlattu a ni chu ngaihsanawm a tih thu sawiin, thlei bik nei lova mipuite hrut rualtu a ni leh khawtlang mipuite thlamuan fotu a ni thin chu fakawm a ti a. Pawl ngaihdan ni lova tute emaw ngaihdan ang chauha a kal mai loh nan leh a thiltum anga a kalzel theih nana theihtawp chhuah tlan a pawimawh thu sawiin, zonun zemawi tlawmngaihna leh adangte chhawmnun zel kawngah kan zavaia tanrual a ngai a ni, a ti a. Tlawmngaihna chu phut let nei lo a nih anga chawilar deuh deuh a tul thu leh inzirtirna tam zawk neih a pawimawh thu a sawi bawk a. Khawvel ram changkang leh hmasawn mek zel karah chhungkua leh khawtlang nun a danglam nasa lutuk leh inpumkhatna a ti chhe thin chu pawi a tih thu sawiin, YMA member kalkhawmte chu nu leh pate leh aia upate thu awiha zahna chang hre turin a fuih a. Inkhawmpui hmangtute chu mahni zawn theuhah zonun zemawi leh hnam ziarang mawi tak takte pholanga midangte tihhmuh leh zirtirtu nih tum theuh turin a chah a ni.

EF&CC Minister chuan thalaite chu mahni dinhmun mil ang zela nung thiam tur leh mahni neih tawka lungawi thiam turte, ngaihtuahna dik leh hrisel, taimakna leh rinawmnate nunpui a, sum awlsam leh dan lova thil tih pawisak lohnate hnualsuat zawk thin turtein a chah a. Mahni kutkea ding thei tur leh intodelh thei turte, hnathawh hreh nei lova theihtawp chhuah turtein a fuih bawk a. Kum sangbi tel lo changkang tawh hnam dang leh ram dangte nena intehkhin mai lova, an dinhmun ang leh a aia sang zawk thleng thei tura taima leh rinawm taka thawk tura ngaihtuahna seng turin thalaite a sawm a. Hmabak eng tak kan nei a, ngaihtuahna dik leh ziktluak tak kan neih hmasak phawt chuan kan ram hian hmasawnna nasa tak a nei thei dawn a ni, a ti a. Kalkhawmte chu ram leh hnam hmangaihna dik tak nei a, hmasawn nana tih theih neih angte ngaihtuah chunga theihtawp chhuah tum turin a sawm nghal bawk.

Khualzahawm East Tuipui bialtu MLA Pu Ramthanmawia, Vice Chairman, Bamboo Link Road Board chuan ram leh hnam tana rawngbawl turin mahni inphata thahnemngai taka thawh chhuah a pawimawh thu sawiin, tanpui ngaite tanpuitu YMA chu mirethei leh chhumchhia zawkte dawmkan kawnga thawhpui zel atan a sawm a. Mipuite hamthatna leh dinkhawchhuah theihna tura hmalak chu a tum ber a nih thu sawiin, a bial chhunga tanpui ngai an awm chuan a hnena hrilhhre zel turin kalkhawmte a chah a. Khawtlang huapa ruihhlo do a tul takzet thu leh, natna inkaichhawn theih AIDS do kawnga tanlak a pawimawh takzet thu a sawi bawk a. Kalkhawmte chu social media hman dan tawk thiam tura fuihin, bulbal nei lo leh finfiahna awm lo thuthang nazawng thehdarh thin lo tur leh, finfiah hmasa lova awih mai lo turtein a chah a. Ram leh hnam tana hruaitu hmasate inpekna leh an thawhrah kaltlanga hmasawnna awmte theihnghilh lova chhawmnun zel tum zawk turin thalai kalkhawmte a fuih a. Aia upate zahna chang hria a, an thute awiha chawimawi thin turin a chah bawk.

Bamboo Link Road Board Vice Chairman Pu Ramthanmawia chuan Tuipuiral chu hmun nuam tak, zonun zemawi chawilarna hmun pawimawh tak a nih thu sawiin, hripui leng, lirnghing, vawkpul hri leng leh raltlan dawnsawn kawnga Tuipuiral Group YMA in amah an tawiawm thinna leh finchhuah thinna avanga harsatna lian tham pumpelh a ni chu entawntlak a tih thu a tarlang a. Hruaitu hmasate chungah lawmthu sawiin, hruaitu thlan tharte pawh Sawrkar thawhpui thiam mi ni chhunzawm zel turin a sawm a. East Tuipui bial chhungah JJM kaltlanga tuilakna tur tuihnate dap mek zel a nih laia tuihna tlem tial tial chu veiawm a tih thu sawiin, mipuite chu tuihna leh tuihna siamtu ramngawte tha taka humhalh tura tanlakpuiah a sawm a. Tuipuiral tlangdunga inkalpawhna kawngpui tha tak siam a ni chu lawmawm a tih thu sawiin, a chhawr tangkaitu mipuite a lawmpui thu a sawi a. Zirna tihhmasawn nan theihtawp chhuah a nih thu leh, bial chhunga Zirtirtu indaihlohna awmte pawh ngaihvena a tul anga hmalak zel a nih thu a sawi bawk a. PMJVK kaltlangin khawtin mamawhte khawtlang hruaitute rawna project siama thehluh zel a nih thu a sawi a; YMA member-te chu bial chhunga hmasawnna ruhrel siamte ngaihvena, hna tlo leh rotling siam a nih theih ngei theih nana vilpui tlat turin a sawm nghal bawk.

He hun hi Tuipuiral Group YMA Vice President Pu C.Lalpekthanga chuan kaihruaiin Secretary Pu B.Challianngura'n hun hman dan tur tlangpui a tarlang a. Pu C.Vanlalvunga, Group EM in hunserh a hman hnuah Pu PB Rosanga, Group EM in kalkhawmte lawmna thu a sawi a. Pu Lallawmawma, Group EM kaihhruaiin thuthlung sawi rual a ni a, President Pu MC Lalramenga hnen a?angin thusawi ngaihthlak a ni bawk.

Ramngaw leh nungcha humhalh kawnga Branch YMA tithate hnenah lawmman sem chhuah a ni a, lawmman dawngtute chu:
Pakhatna: Leisenzo Branch YMA
Pahnihna: Khawbung Branch YMA leh Bungzung Branch YMA
Pathumna: Khuangthing Branch YMA
Tukin khan Central Young Mizo Association (CYMA) leh Sub-Hqrs. YMA (SYMA) Champhai hruaitute kaihhruaiin kum 2023-2025 atana hruaitu tur thlan a ni a, hruaitu thlan tharte chu:
President: B.Challianngura, Zawlsei Branch YMA
Vice President: Lallawmawma, Bungzung Branch YMA
Secretary: T.Zirthangpuia, Farkawn Branch YMA
Asst. Secretary: C.Lalremruata, Leithum Branch YMA
Treasurer: T.Thanglura, Vangchhia Branch YMA
Fin. Secretary: H.Lalchhuanawma, Lianpui Branch YMA

Tuipuiral Group YMA inkhawmpui vawi 45-na hi Vau thla ni 28-30, 2023 chhung hian 'Ram Leh Hnam Humhalh' tih thupui hmanga neih a ni a. Inkhawmpui chhung hian EF&CC Department, PHE Department leh PWD te'n Department kaihhnawih hrang hrangte zirtirna an pe a. Zai, lam leh program benglut tak takte ngaihthlaka thlir ho niin, hun hlimawm leh hlawkthlak tak hman a ni a. Zanin hian Tuipuiral Group YMA inkhawmpui tum 45-na hi a tiak dawn a, nakum hi rorel inkhawm neih kum niin, Tuipuiral Group YMA rorel inkhawm hi Vaphai khuain a thleng dawn a ni.

Tuipuiral Group YMA huam chhungah hian Branch YMA 23 awmin tun dinhmunah member 12,585 (mipa 6,598 leh hmeichhia 5,686) an awm mek a ni.