Vawiin khan Chief Minister Pu Lal Thanhawla hovin Chief Minister's Cabinet room-ah Commerce & Industries Minister Pu H.Rohluna leh Parliamentary Secretary Pu Joseph Lalhimpuia bakah Commerce & Industries Department leh Health & Family Welfare Department hotuten meeting pawimawh tak an nei a. Thlai leh ei tur chi hrang hrang, mihring ei atana him leh him lo enfiahna tur Food Testing Laboratory (FTL) a taka hman theih thuai a nih dan tur an sawiho.

Chief Minister Pu Lal Thanhawla chuan ram dang atanga ei tur chi hrang hrang lo lut te, Silchar leh a chhehvel atanga thlai kan lakluh te hi mihring ei atana himlo pesticide leh chemical fertilizer-a sawngbawl a ni fo a. Hei hian Mizo mipuite hriselna thui tak a khawih chhiat avangin ei tur him leh him lo enfiahna tur Food Testing Laboratory neih hi a hmanhmawhthlak hle tawh a ni, a ti.

Food Testing Laboratory neih a nih theih nan Mizoram sawrkar chuan kum 2009 khan DPR siamin sawrkar laipui Department of Commerce-ah a thehlut a. Export Development Fund – North Eastern Region (EDF-NER) hnuaiah a dinna tur sum cheng nuai 308 hmuh a ni. Land Custom Station, Zokhawtharah sak tura ruahman hmasak a nih laiin Zorinpui LCS leh Kawrpuichhuah ICP te rin theih turin Thenzawlah sak a ni ta zawk a. Sum hmuh atang hian FTL a mamawh tur khawl pawimawh engemawzat lei a ni tawh.

Thenzawl FTL hmunah hian tui leh kawlphetha supply a awm rih loh avangin, tun dinhmunah mamawhna a san tawh em avangin Drug Testing Laboratory,AYUSH, Health & Family Welfare Department, Zemabawkah heng khawlte hi bun rih ni se tiin vawiin meeting-ah hian rel a ni a. FTL tha taka a function thuai theih nana bawhzui nghal turin Commerce & Industries Department leh Health & Family Welfare Department official-te telna tur Coordination Committee din ni se tiin meeting-ah hian an rel a ni.

Meeting-ah hian Health Secretary Pu Lalrinliana Fanai, Health Principal Director Dr.K.Ropari, Commerce & Industries Director Pu J.Hmingthanmawia leh heng department pahniha official dangte an tel a ni.