4898/2025-2026

Lunglei, 2026 Vau thla ni 18: Vawiin khan Lunglei District Civil Supplies Officer Pu Lalremruata Sailo chuan a hnuaia mi ang hian mipuite ngenna leh hriattirna a chhuah:

Tun lai US, Israel leh Iran buaina avanga eirawng bawlna gas, diesel leh petrol-a harsatna kan tawh loh nan Central leh State level-ah sawrkarin theih tawp a chhuah mek a. Tun dinhmunah hian eirawng bawlna gas, diesel leh petrol-ah harsatna a awm rih lo va. Chu vangin, hemi chungchangah hian mipuite chi-ai lo turin kan inhriattir e. Chutih rualin, a hnuaia hriattirna hrang hrangte hi zawm ṭheuh turin mipuite kan inngen bawk a ni.

1. Eirawng bawlna gas hi renchem taka hman tur a ni a, kan mamawh bak lak khawl loh tur a ni. Gas booking hi i lak ni aṭanga ni 25 hnuah chauh booking a tihnawn leh theih ang.
2. Eirawng bawlna gas chheprelh leh zawrh chhawn hi khap tlat a ni a. Chuti anga lo titute kan hriat chuan thuneitute hnenah report tur a ni.
3. Diesel leh petrol hi thuneitute'n phalna an pekte chauh lo chuan bur/gallon/barrel-a lak chhuah phal a ni lo.