4897/2025-2026

Lunglei, 2026 Vau thla ni 18: March ni 16, 2026 khan Lunglei District Bawrhsap Pi Navneet Mann chuan Lunglei District-a tuialhthei (Petroleum, Oil & Lubricants – POL) leh eirawng bawlna gas (Liquefied Petroleum Gas – LPG) awm dan leh sem darh dan thlithlai leh vil turin District Emergency Operation Centre (DEOC) chu Joint Control Room atan ruat a nih thu hriattirna a chhuah.

Hei hi ni tin mamawh khaihlak lova a awm theihna tur leh khawvel ram hrang hrang buaina kara mipui tiralkhel thei zawnga thuthang dik lo awm thei venna tura Joint Control Room siam tura Mizoram sawrkar thupek bawhzuina a ni a. Lunglei District Joint Control Room hi tihnun nghal niin, POL leh LPG hnianghnar dan dinhmun te, a kaihhnawih harsatna hrang hrang te vilin, he'ng bungruate chheprelh, a mantova zawrh leh mipui tichi-ai thei zawnga thu dik lo theh darh awm thei te veng turin hma an la dawn a. DEOC hi phone number 9862653478-ah hian biak pawh theih reng a ni.

Joint Control Room-ah hian Deputy Commissioner, Superintendent of Police, District Civil Supplies Officer, District Information & Public Relations Officer (DIPRO) leh DEOC/DDMA ai awhte an tel.