4896/2025-2026
Aizawl, 18th March, 2026 : Vawiin chawhma dar 11:00 khan LR&S Directorate Conference Hall ah LR&S Miniter Pu B.Lalchhanzovan Saitual Town area a khaw 6 survey zawh tak te ah Record of Rights (RoR) a semchhuak.

He hunah hian Minister chuan thu sawiin, Revenue Departmentah thil thar leh tihdan tharte an kalpui mek zel a ni a ti a, chumi kawnga mipui thlawpna an dawng tha chu lawmawm a tih thu a sawi a ni. LR&S departmenta a thawhpuite chu a lian ber atanga a te ber thlengin mipui rawng an bawlna ah theihtawp an chhuah avangin lawmawm a ti a, an thahnemngaihna avangin SASCI Part VII-A hnuaiah mellung pawimawh ULPIN generation, Mobile number & Address seeding leh vawiina kan sem mek Standardised RoR hman avangte a incentive cheng vaibelchhe 29.57 kan hmu leh thei chu lawmawm a tih thu sawiin, hma lakna tur erawh a la tam hle a ni a ti.

Saitual town area a RoR semchhuah a ni ta chu Minister chuan kalphung thar a nih thu sawiin, hetah hian ram chungchanga hriat ngai leh tulte chu a awm vek thu sawiin hei hi a felfai zawk bakah a bo thu ah pawh LSC tihbo anga buai viau na tur a awm lo a ni tiin, Saitual District a khua la survey loh khaw 28 te pawh Drone hmanga survey zawh tawh niin, tun atanga reilo te ah Property Card 4423 semchhuah thuai a nih tur thu a sawi.
Bialtu MLA Prof. Lalnilawma, Minister of State ni bawk pawhin a bial chhung khua a resurvey neih zawhfel a ni ta chu lawmawm a tih thu sawiin, kalphung thar sawrkarah tihdan tha zawk leh tharte huai taka an kalpui avangin LR&S Minister leh thawktute an fakawm a tih thu a sawi a ni.

Saitual Town resurvey hian VC area paruk huamin, ROR awm zat chu Sihfaah 285, Keifang Venghlunah 476, Keifang Venglaiah 164, Keifang Leitanah 364, Rulchawmah 361, Ruallungah 238 niin, a vaiin 1879 a ni a, heng zinga 1670 te hi peihfel niin, a dang 209 te hi documents la fel loh avanga la pekchhuah theih loh a ni thung. Heng RoR te hi Revenue Branch, DC Office Saitualah a neituten an lak chhuah tura ruahman a ni.

Saitual Town resurvey hi Buannel Geo Solutionsin thawkin March ni 11, 2022 ah hna tan a ni a, report hi April 25, 2023 ah an thehlut a. Buaipui ngai leh a hmuna enfiah leh ennawn ngaite Department lamin an ennawn hnuah, Caisias Research and Consulting ten RoR a hlawma siamna application an siam kaltlangin rang zawkin ROR te chu peihfel a ni.