No.4372/2021-2022
Aizawl the 23rd March, 2022 : Vawiin khan Food Civil Supplies and Consumer Affairs Department buatsaihin Secretariat Conference Hall, MINECO-ah eirawngbawlna gas (LPG) leitute chenna ina dah (home delivery) chungchang sawiho a ni a. FCS&CA Secretary Pu Zothanmawia’n meeting hi a kaihruai a ni.

Mizorama a hmasa ber atan LPG Home Delivery hi September 5, 2019 khan pilot project atan MIZOFED Gas chuan College Veng, Aizawlah a kalpui tan a. College Veng khawtlang hruaitute leh MIZOFED thuneituten sawihona neiin a kalpui dan tur an ruahman a. Mipuiah awareness campaign neih a ni bawk a. Ruahmanna angin home delivery hi kalpui niin vawiin thlengin tluang takin kalpui a la ni. IOCL guidelines ang leh Department ruahmanna angin Aizawl khawpui chhunga LPG Distributor 11 awmte atangin an area a veng pakhat theuhah LPG Home Delivery hi kalpui tura ruahmanna siam a ni a. Sub-Committee of Consumer Advisory Committee on LPG ruahmanna angin LPG Home Delivery rate hi IOCL in rate a siam bakah cheng 70 mipui ten chawi turin ruahmanna siam a ni.

Tun dinhmunah MIZOFED in College Vengah, Zothan Indane in Zonuamah, Caravan Gas in Falkland-ah, Suakchhunga Gas Agency in Dawrpuiah Home Delivery hi an kalpui mek a. LPG home delivery la kalpui thei ve rih lo Distributor 7 te bakah kalpui mek te pawhin veng tam zawkah an kalpui theih nan ruahmanna siam a ni. LPG home delivery kalpuina tur veng te chu- Zopuii Indane in Chawlhhmun leh Govt Complex-ah ; Suakchhunga Indane in Zarkawt leh Bethlehem; Caravan Gas in Zemabawk North leh Zemabawk; MIZOFED Gas in ITI Veng, Venghlui leh Tuikual South; M&B Indane in New Capital Complex, Nursery leh Khatla South; Zoram Indane in Laipuitlang leh Chaltlang Lily Veng; Zopuii Gas in Zotlang, Kanan leh Dinthar; V. Neiha Gas in Thuampui Veng, Zuangtui leh Bawngkawn Chhim Veng; Biakkungi Gas in Aizawl Venglai, Ramthar leh Chanmari West; Vanbuangi Gas in Venghnuai, Model Veng leh Mission Vengthlang; Kapliana Gas in Saikhamakawn leh Tlangnuam.

LPG home delivery kalpui tura ruahmanna siam tawh veng hrang hrang tarlanah te hian COVID-19 hripui ram chhunga a len avang leh harsatna dang avangin April, 2020 atang khan mumal leh chak taka kalpui chhunzawm hleih theih a ni ta lo a. Vawiin meeting-ah hian Aizawl Municipal Corporation huamchhunga veng tinah LPG home delivery tha taka kalpui a nih theih dan tur rawtna hrang hrang ngaihthlak a ni a. Consumer te leh distributor lamin harsatna an tawh dan te, Mizo khawtlang nun leh khawsak phung mila home delivery kalpui theih dan tur sawiho niin zawhna leh chhanna hun hman a ni bawk.

Vawiin meeting-ah hian Mizoram Consumers Union, IOCL leh pilot project kalpuina veng hrang hrang aiawh ten thu an sawi a. Home Delivery kalpui hmasakna ber College Veng Local Council Chairman hnen atangin home delivery an kalpui dan, mipuiin an dawnsawn dan leh an tangkaipui dan ngaihthlak a ni a. Home delivery system kalpui mek Distributor te aiawhin Zothan Indane Agency aiawh chuan thu a sawi bawk.

Pu Mainik Patra, General Manager, LPG Sales, IOCL; Pu Z Lungdim, Chief Plant Manager Borkhola Bottling Plant te bakah Central YMA, Mizoram Consumers Union, Aizawl City Area Local Council Association leh Distributor aiawh te he meeting ah hian an tel a ni.