1662/2026-2027

Kolasib, 5th August, 2026: Vawiin khan DC Conference Hall, Kolasib-ah Kolasib Bawrhsap Pu H. Dolianbuaia kaihhruaiin Eklavya Model Residential School (EMRS), Bilkhawthlir enkawlna leh hmasawnna tur chungchang ngaihtuahin District Level Committee pawimawh tak an thukhawm.

Thutkhawm kaihruaitu Bawrhsap Pu H. Dolianbuaia chuan thu sawiin, EMRS chu thingtlang leh hmun kilkhawr zawka awmte, a bik takin tribal naupangte tana zirna tha leh changtlung an dawn theihna tura sawrkar laipui hmalakna ropui tak a nih thu a sawi a.  Sikul enkawlna kawnga thawktute inpekna fakawm a tih thu sawiin, hmasawn ngaihna la awmte leh harsatnate chu district thuneitute leh department hrang hrang ten tangtlanga chinfel pui thuai a tul thu a sawi bawk.

Tun dinhmunah EMRS Bilkhawthlir-ah hian Class 6 atanga Class 9 thleng awmin, zirlai naupang (students) 240 an lut mek a. Sikul hi staff 35 in an enkawl mek a, chung zingah chuan zirtirtu (teaching staff) 14 an awm a ni.

He thutkhawmah hian EMRS enkawlna dan (guidelines) anga sikul kalphung tlangpui leh zirlaite dinhmun thlirhona neih a ni a.  Zirlaite hriselna ngai pawimawhin kum khatah vawi hnih tal (bi-annual) health check-up neihpui thin nise tih rel a ni a. Hemi bakah hian sikul mamawh hrang hrang - tlawhpawhna kawngpui tha, tui in tur thianghlim leh kawlphetha (power supply) mumal tak an neih theih dan turte sawiho a ni .

District administration hmalakna hrang hrang awm sate nena tangkawpa zirlaite hmasawnna tura ruahmanna siam dan turte uluk taka sawiho a ni bawk.

Sikul mamawh leh harsatnate sawichhuah a nih hnuin, tui dahkhawlna tur (water reservoir) an mamawh chu a theih anga ngaihtuahpui nise tih a ni a. Zirlaite hmalam hun atana pawimawh tak, Career Guidance leh mamawh dangte pawh a remchan dan anga neihpui thin nise tih rel a ni. Hemi bakah hian Chairman, Kolasib Bawrhsap chuan a hun remchang hmasa berah a hmunah ngei kalin sikul dinhmun enfiahna (school visit) a neih tur thu a sawi bawk.