1663/2026-2027

Kolasib, 5th August, 2026: Vawiin khan DC Conference Hall, Kolasib-ah Kolasib Bawrhsap Pu H. Dolianbuaia kaihhruaiin Kolasiba kumin Independence Day 2026 ropui leh hlawhtling taka hman a nih theih nana inbuatsaihna kal mek leh ruahmanna siam tawhte thlirletna (preview meeting) pawimawh tak neih a ni. He thutkhawmah hian District chhunga Head of Offices hrang hrangte leh sawmbikte an tel a ni.

Thutkhawm kaihruaitu Bawrhsap Pu H. Dolianbuaia chuan thu sawiin, Independence Day chu India in zalenna a hmuh champha phak a nih ang ngeiin, thinlung takin hlut thiam ila, zalenna sualtute inpekna leh an tawrhna te hrechhuak thar leh turin mipuite a chah a. District chhunga sawrkar department hrang hrang, tlawmngai pawlte leh mipuite tanrualna nen urhsun leh hlimawm taka he ni hi hman a nih theih nan theih tawp chhuah tlân a pawimawh a ni, a ti.

Khawtlang hruaitute leh mipuite pawh he ni ropui lawmnaah hian phur taka tel theuh turin a sawm nawn leh a ni.

Thutkhawmna a sawiho angin , kumin Independence Day lawmna pui ber hi August 15, 2026 khian Kolasib Sports Stadium-ah zing dar 7:30 atangin hman a ni ang. Zing khawvar rualin sawrkar leh mimal in tinah hnam puanzar (National Flag) zar kan a ni ang a, a hmunpuiah Khuallianin hnam puanzar pawt pharhin hnam hla (National Anthem) sak a ni ang. National Anthem hi Govt. Diakkawn H/S Band Party ten an rem dawn a ni.

Kumin Parade Contingent-ah hian Armed contingent atangin 1st IR Bn., Mualvum an tel ang a, Unarmed leh School Contingent hrang hrang - sawrkar leh private school, college leh DIET atangin contingent thahnem tak an thawk chhuak bawk ang.

He  ni pawimawh hlawhtling taka hman a nih theih nana chanvo hrang hrang intukte chu uluk taka thlir nawn leh nghal a ni a. Hmunhma chei, tihfai leh a hmanna tur buatsaih hna chu UD&PA, PWD leh PWD Road lam mawhphurhna a ni ang a, PHE lamin tui in tur leh a mamawhna hmuna hman tur an supply ang. Sound system, programme puan leh a hmun rênga thlalak leh video coverage hna chu I&PR Department (DIPRO) chan tur niin, First Aid leh Medical Duty chu DMS/CMO/DSYO te chan a ni thung ang. Security leh Traffic herrem hna erawh Police (SP) lamin mawh an la dawn a ni.

Hemi ni hian thupuangtu (Compere) tur atan Pu Samuel Lalrinawma leh Pi R.C. Vanlalhlimpuii te ruat an ni a. Stadium-a Independence Day hman zawh hian DC Bungalow-ah 'At Home' programme hman zui nghal tura ruahman a ni bawk.