1664/2026-2027

Lunglei, 2026 Thlazing ni 5: Vawiin khan Central Silk Board (CSB) leh Lunglei District Sericulture Office ṭang kawp huaihawtin District Sericulture Office, Lungleiah MRMA 2.0 (Mera Resham, Mera Abhimaan/My Silk, My Pride) kalpui dan tur chungchanga inrawn khawmna, "District Level Stakeholder Consultation Meeting" buatsaih a ni.

Central Silk Board aṭangin Scientist-B Dr Vikram KV chuan hun hmanpuiin, Sericulture Department hotute bakah pangang khawitu leh a ngaihventu (Sericulture Interest Group) eng emaw zat an tel a. Lunglei District Sericulture Officer Pu ZD Zoramthanga'n hun kaihruaiin, Serkawn Local Council Chairman Pu R. Lalhriatpuia leh Zonet JB Editor Pu Chawngchhuana Chongthu te'n thu an sawi a. Zawhna leh chhanna leh sawi hona hun hman a ni bawk.

Dr Vikram KV chuan MRMA 2.0 hma lakna leh a pawimawhna sawiin, Sericulture lama hma latute hmasawnna turin ni 100 chhung awh National Technology Transfer Campaign buatsaih a nih tur thu a sawi a. NRMA 2.0 chu farmer-te'n an la hriat kim loh pangang khawi dan, Sericulture Technology CSB-in a duante ṭha zawk leh famkim zawka pangang khawitute hnen a thlen theih ngeina tur leh MRMA 1.0 kalpui mek ṭha zawka chhunzawm zel a nih theih nana ruahman a nih thu sawiin, Distict tina mamawh leh dinhmun dik tak hre turin a hmuna zir chianna baseline survey leh stakeholder-te nen inrawn khawmna hmangin ruahmanna siam ṭhin a nih thu a sawi a. Hmun hrang hrangah inang tlanga kal lovin, district tin mamawh leh harsatna milin hma lak ṭhin a nih thu te, pangang khawi dan zir hona leh scientist-te nena inkawm hona te buatsaih ṭhin a nih thu te, campaign hun chhung bakah pawh CSB scientist-te'n a ṭul anga hma an lakpui zui zel theih nan te ruahmanna siam a nih thu a sawi a. CSB, State Sericulture Department, research institution leh pangang khawitute inkarah thawh hona ṭha zawk siam a, pangang khawitute hlawkna tur leh ei leh bar kawnga hmasawnna tura an thiamna tihpun te,  India ram puma kum 2030-31 chhunga raw silk metric tonne 60,000 siam chhuah tuma hma lakna puitlin tura theih tawp chhuahpui te chu MRMA 2.0-in a tum a nih thu a sawi.

MRMA 2.0 hian India ram hi kum 2047-ah chuan khawvela maimaw puan (silk) thar chhuak tam ber ramah siam a tum a. Ram dang aṭanga silk lak luh tihtlem a, mahni ram chhung ngeia silk thar chhuah leh thawn chhuah tam te; sericulture farmer-te dinhmun siam ṭhat a, eizawnna ngelnghet an neih theih nana farmer-te hnena training leh technical support pek te; a bikin hmeichhiate leh ṭhalaite tana hna thawh tur siamsak te a ni.