Karleh November ni 25-a Mizoram Assembly Inthlanpui lo awm tura atana inbuatsaihna kal zelah vawiin khan Aizawl District huam chhunga Polling Station hrang hranga Presiding Officer, 1st, 2nd leh 3rd Polling Officer mi 1550 te tan Vanapa Hall-ah chawng hnihin Final Briefing neih a ni.

Final Briefing-ah hian Aizawl DC Dr. Franklin Laltinkhuma chuan Inthlan chung leh a kaihhnawih duty ah hian Presiding Officer, Polling Officer leh election chungchangah mawhphurna nei zawng zawng te chu Election Commission of India-a deputation-a thawk vek kan nih tih hriat hi a tha a tiin Presiding leh Polling Officer-a ruat zawng zawng te chu theihtawp chhuaha duty turin a sawm.

Returning Officer Pu V. Lalengmawia chuan hun vawn dan tur chungchangte, form hrang hrang fill up lawk thei thu te, duplicate voter slip issue dan chungchangte chipchiar takin a sawi a, election kaihhnawih bungrua hrang hrang leh Electronic Voting Machine lak ni tur te chu briefing-a tel te hi hriattir nghal bawk. Election bungrua leh lehkha te hi November ni 22 leh 23 ah te pekchhuah a ni dawn a, EVM hi November ni 23 leh 24 ah te Polling Station a dah turin phurh chhuah a ni ang.

Asst. Returning Officer Pu Lalrohlua chuan EVM leh VVPAT chungchanga hriattur pawimawh hrang hrang te tarlangin EVM-a chhiat thut a chet lak dan tur chungchang te sawi a, chutiang a thlen palh thut chuan duty te chi aia lo tur leh hotute hriattir nghal turin a hrilh bawk.

Chawhma khan Tuivawl, Chalfilh, Tawi, Aizawl North I, Aizawl North II, Aizawl North III leh Aizawl East I Assembly bial chhunga Polling Station hrang hrang a duty tur te hi briefing pek a ni a. Hetiang bawk hian chawhnu lam khan Aizawl East II, Aizawl West I, Aizawl West II, Aizawl West III, Aizawl South I, Aizawl South II, leh Aizawl South III Assembly bial chhunga duty tur tan briefing nei zui nghal a ni bawk.

Vawiin vek khan Vanapa Hall-ah Postal Ballot hmanga Vote thlak dil te tan vote thlakna hun siam nghal a ni bawk.