Village Council inthlan lo awm tur atan a inbuatsaihna kal zelah vawiin khan Pu Zothankhuma, IAS, Observer, Mamit District hovin DEO Pu Vanlalngaihsaka pisaah District Level Standing Committee an thukhawm.

Pu Zothankhuma chuan inthlanna felfai leh muanawm tak kan neih theih nan tanrual a pawimawh thu sawiin, thawhhona tha tak an neih a beisei thu a sawi a. Vote tla te zana chhiar tur a nih avangin eng chatlak lo a aawm theih nan P&E Dept. lamin mawhphurhna sang tak an neih thu sawiin, inkalpawhna kawng lamah pawh PWD ten hma an lak a ngaihthu a sawi a. Pu Zothankhuma chuan ziak chhiar thiamlo leh rualbanlo mahnia vote thlak theilo te pui turin polling staff te hman a rem loh thu sawiin, hei hi inthlan resultah saawibuai a awm loh nan a nih thu a sawi a, ballot paper polling booth pawnah ken chhuah a rem loh thu a sawi bawk.

District Election Officer Pu Vanlalngaihsaka chuan District chhunga VC seat awm zat te leh voter awmzat te kalkhawm te hriattir nawn lehin ballot paper pahnih; reserved seat tan pink leh general tan a var hman a nih tur thu a tarlang bawk.

Mamit SP Pu C. Lalnunmaawia’n inthlan vuakveta venhimna pek dan tur sawiin, venhimna buaipui turin mi 227 dah an nih tur thu leh a tul thut koh belh tur mi engemawzah dah an nih thu a sawi lang tel bawk. SP chuan sensitive polling station a ngaihtheih paruk : Zomuantlang, Khantluang, Tuipuibari-I, Damparengpui, Mualthuam leh Kolalian a awm thu sawiin, heng station a venhimna pe tur hian MRP 1 leh Armed Guard 5 dah an nih tur thu a sawi bawk.

Hei bakah hian MPF Mamit District Forum Pu C.L. Thantluanga’n MPF hmalakna leh ruahman te kalkhawmte a hrilhhria a. NGO dangte nen thawhhona tha tak an neih thu a sawi lang bawk. Political Party aiawh ten  symbol in pek chungchang leh ballot paper a hming dah dan indawt chungchanga hriatfiah tawkloh lai leh buaina awm thei zawhna an neih te inhrilhfiah na hun  neih a ni bawk.

Vawiin ni vek hian Mamit DC Conference Hall-ah VC inthlan lo awm tur Returning Officer te tan Final Training nilengin buatsaih a ni a, Asst. DEO Pu Malsawmtluanga, SDEO Pu Mickey Lalenkawla leh SDC Pu Vanlalhmachhuana ten zirtirna an pe a ni.