2264/2023-2024

Champhai the 11th October, 2023 – Mizoram Assembly Election, 2023 hmachhawn tura Champhai District inpuahchahna kal zelah vawiin chawhma khan Champhai DC&DEO Pu James Lalrinchhana kaihhruaiin DC Conference Hall, Keifangtlang-ah Enforcement Agencies meeting neih a ni.

Meeting-ah hian Champhai District-a election kaihhnawiha Dan leh thupek kenkawh kawnga hmalakna kal mek leh inpuahchahna te, Dan ina a phal loh thil tawlh ruk awm thei ven dan tur te, intelligence chungchanga hmalak tul te, Dan bawhchhiatna a awmlohna tura enforcement agency hrang hrang te mawhphurna leh an thawhho dan tur te chipchiar taka sawiho niin, hmalak tlan dan tur rel a ni.

Meeting kaihruaitu Champhai DC&DEO Pu James Lalrinchhana chuan Champhai District chu Myanmar international border thui tak awmna anih avang leh ruihhlo leh thil dang tawlh ruk thin luhka anih avangin Election Commission of India (ECI) hotute pawhin Champhai District an ngaih pawimawh thu a sawi a. August ni 30-a ECI full Commission hova meeting neih naah Commission hotute hian Champhai District-a election kaihhnawiha dan leh thupek kenkawh leh venhimna kawnga hmalakna chak tak neih tul an tih thu a sawi a. Hemi avang hian Election Observer lokal tur te pawhin uluk taka an rawn enfiah tur thu leh hemi hmachhawn tur hian Enforcement Agency tin te uluk taka duty chhunzawm tur leh an report te mumal taka lo in buatsaih turin a chah a. Enforcement agency hotute chu District chhunga venhimna kawnga mawhphurhna fawng chelhtute an nih angin an inpuahchahna uluk leh fimkhur taka kalpui a, inpawh tlang taka thawkho turin a chah a ni.

Champhai SP Pu Lalrinpuia Varte chuan report pe in election vuakveta venhimna thawk turin Champhaiah CAPF company pali (4) an rawn luh tur thu a sawi a. Heng CAPF thlenna tur te hi ruahman chhoh mek niin, Mizoram Police duty tur te pawhin Champhai District anlo thlen tawh thu a report a ni.

Pu Lalduhthlana, DFO Champhai chuan EF&CC Department chuan Champhai, Ruantlang, Zote leh Hnahlan ah te Check Post an neih thu leh duty ngawrh taka kalpui anih thu a report a. Wildlife Protection Squad staff 40 an neih belh thu leh he Squad-te hi Hnahlan, Khawbung, Farkawn, Ngopa leh Champhaiah te an duty tur thu leh mobile patrolling pawh kalpui anih tur thu a report a ni.

Pi Mona Zote, Deputy Commissioner of State Tax pawhin report pe in, Champhai District-a warehouse leh godown te Taxation Department chuan uluk taka vil in, State sawrkarah kar tin report an thehluh thu leh tun dinhmunah thil rinhlelhawm anla hmuh loh thu a report a ni.

Pu Manesia Khaimeichho, DTO Champhai chuan inthlan vuakvetah MVI ten license leh vehicle movement-te enfiahin District chhungah Spot Checking an kalpui mek thu a report a. Transport Department leh Traffic Police tangkawp te chuan Special Drive kalpui chho mekin, Election-a duty tur lirthei te pawh Fitness Checking uluk takin an nei dawn a ni.

Asst Commissioner, Excise & Narcotics Department Pu C. Thangchhuanga chuan END hmalaknain ruihhlo checking uluk taka kalpui anih thu report in, District chhungah Flying Squad pathum (3) an duty thin thu leh, mobile checking te neih thin anih thu a report a ni.

Vawiin meeting-ah hian Champhai SP Pu Lalrinpuia Varte; Champhai District Election Nodal Officers-te; leh Champhai District chhunga Enforcement Agency hrang hrang - Post Commander 42 Assam Rifles; Deputy Commissioner of State Tax; Assistant Commissioner of Excise & Narcotics; Divisional Forest Officer; District Transport Officer; Deputy Central Intelligence Officer, SIB; Assistant Controller, Legal Metrology; Superintendent, Custom Preventive Force; Superintendent, Land Custom Station; leh Officer Commanding 74RCC te an tel a ni.