Vawiin hian Serchhip District Election Officer Dr. Lalrozama, IAS, Serchhip Bawrhsap ni bawk chuan a Pisaah Election Commission of India thupek chhuah angin Special Summary Revision of Photo Electoral Roll, 1.1.2017 tehfunga hmanga buatsaih chu a tlangzarh a, Political Party leh tlawmngaipawl aiawhte hnenah Roll thar hi a hlan nghal bawk. 

Dr. Lalrozama chuan, Electoral Roll hi a lan danah chuan data dahkhawm, chhiar leh zirchian peihawm loh tak a ang a, amaherawh chu hetah hian ram mipuite dinhmun, khaw tina mihring awm dan dinhmun leh hmasawn dan (Population trends) chiang taka hriat theih a ni a, a tuiawm a, a tangkai em em a ni, a ti. Electoral Roll felfai leh kimchang tak buatsaihtu thawktute thawhrimnaah lawmthu sawiin tlawmngaipawl leh khawtlang mipuiten tha taka thawktute an lo tawiawm thin avanga lawmawm a tih thu a tarlang tel bawk. 

Election Officer Pu R. Vanrengpuia, MCS chuan Roll thar dinhmun tlangpui sawifiahna a nei a, Draft Roll atana hman Electoral Roll 2016 ah chuan Serchhip District chhunga Constituency pathum atanga vote thlak thei zawng zawng hi mi 46,517 an awm laiin a tharah hian mi 47,326 an awm a, an zinga mi 24,080 te hi hmeichhia niin a dang 23,246 te hi mipa an ni; voters punna hi mi 809 a ni. Roll siam chhunga Claims and Objections lut hi 1,289 a tling a, chutihlaiin pem leh thihna thil vel avanga paih ngai 480 an awm, kum 18 tling thar Roll a thun thar hi mi 1055 an ni. Vanneihthlak takin sakhuana avanga Electoral Roll a lut duhlo emaw inpaih tum emaw tumah an awm lova. Heti hian District chhunga mipui awmzat (Projected Population as per Census 2011) atanga vote nei thei zat percent (Elector Population Ratio) chu 64.35% a ni a, nikum aia kumina voters punna rate chu 1.74% a ni bawk a ni. 

Serchhip District chhungah hian Assembly Constituency pathum, 26-Serchhip (ST) A.C, 27-Tuikum (ST) A.C leh 28- Hrangturzo (ST) A.C te an awm a, vawiina tlangzarh tak Electoral Roll thar ber kimchang en duh leh hrechiang duhte tan heng bial pathuma Electoral Registration Officer (ERO) te theuh, N. Vanlaiphai SDO Office, Thenzawl SDO Office leh Election Officer te hnenah leh Office dang Serchhip BDO leh E Lungdar BDO Office ah te en theiha tarchhuah a ni ang.

Attachment

  • Loading attachment...