No.3389/2021-2022

Aizawl the 14th December, 2021: Champhai District chhunga Special Summary of Photo Electoral Roll 2022 kalpui mek endik tura Election Commission of India (ECI) in a ruat Electoral Roll Observer Dr. Lalzirmawia Chhangte, IAS, Secretary, School Education & Cooperation Department hovin vawiin khan Special Summary of Photo Electoral Roll 2022 kalpui mek chungchang sawihona leh inrawnkhawmna DC Conference Hall-ah neih a ni.

Dr. Lalzirmawia Chhangte chuan Special Summary Revision of Photo Electoral Roll chu India khua leh tui dik tak leh kum tling chinte Electoral Roll-a an chuan ngeina tura hmalakna a nih thu leh paih ngai, insawn leh siam that tul dangte buaipuia Roll dik leh felfai tak puahchahna a nih thu a sawi a. India ram chu khawvela mipui siam sawrkar democracy ram lian leh hlawhtling ber a nih thu sawiin, inthlanna thianghlim leh felfai awm theihna bulpui ber chu Electoral Roll dik leh felfai tak neihah a innghat thui hle a ni, a ti a. ECI inkaihhruaina siam leh Representation of the People Act, 1951 ten a sawi angin Election kaihhnawih buaipuitu Official ten Electoral Roll dik leh felfai tak buaipui kawngah fimkhur taka hma an lak thin thu leh, Champhai District-a Roll Revision hmalakna chak leh felfai tak a hmu chu lawmawm a tih thu sawiin, Official- te bakah anmahni tawiawma thlawp thintu NGO, Political party leh mipuite chu fakawm a ti a. Khua leh tui dik tak, kum tling tawhte Roll-a an chuang chu an chanvo a nih thu a sawi bawk.

He hun kaihruaitu Deputy District Election Officer Pu Henry C.Lalrawnkima, ERO, 24-Champhai South AC ni bawk chuan Champhai District chhunga Electoral Roll siamthat kalpui mek endik tura lokal Observer chungah District hmingin lawmthu a sawi a. Kalkhawmte lawmna thu sawiin, ramri dep Champhai District chhunga Special Summary of Photo Electoral Roll 2022 tluang leh felfai taka kalpui a ni thei chu lawmawm a tih thu a sawi a. Roll Revision buaipuitu zawng zawngte leh a hmun thu, thil awm dan phung hriaa hotute tawiawm thintu NGO, Political party leh mipuite chungah lawmthu a sawi a. Finchhuah an ngaihna lai leh thurawn pek tul huna dawngsawng turin Election Official-te an inhawn reng thu a sawi bawk.

Pu Lalnunfela Chawngthu, Election Officer, Champhai District chuan Special Summary Revision of Photo Electoral Roll 2022 kalpui meka hriat tur pawimawh leh hmabak awmte sawifiahin, form lut leh chinfel tawh dante a report a, form lut leh chinfel hna za zela 90 aia tam mah tihfel tawh ni, a ti. Nakin lawka Electoral Roll-a inthun hmabakte leh naupiangte tan pawh mahni awmna veng theuha Registrar of Birth and Death (RBD) kaltlanga Birth Certificate ngaihven a tul thu sawiin, Electoral Roll-a luh hun tawh Birth Certificate neilo an awm thin chuan Roll Revision-ah harsatna a siam thin thu a tarlang bawk.

Nimin December ni 13, 2021 thleng khan Form 6 kaltlangin vote nei thar leh Assembly Constituency (AC) danga atanga luh dilna 2418 te lehkhaa chinfel nghal vek niin, online EROnet ah 2044 te dahluh fel a ni a. Form 7 kaltlangin paih dilna lut 473 te lehkhaa chinfel zawh nghal niin, AC dang atanga paih dilna rawn lut 241 te pawh chinfel nghal a ni a. Paih dilna lutte EROnet ah dahluh fel vek a ni. Form 8 kaltlangin siamthat ngai dilna lut 357 te chinfel nghal niin, EROnet ah 315 dahluh a ni a. Form 8A kaltlangin AC pakhat huamchhunga insawn dilna lut 128 te chinfel vek niin, 121 te EROnet ah dah luh a ni a. EROnet-ah dilna hnawlte dahluh fel a la nih loh avangin za zela za a la ni thei rih lo a ni.

Form 6 kaltlang hian Special Summary of Photo Electoral Roll 2021 khan dilna lut 2404 awmin kumin hian dilna lut 2418 a awm a, kumin san zawkna hi za zela 0.58 a ni a. Form 7 kaltlangin nikum khan dilna 527 a luh laiin kumin hian 473 a lut thung a, a kiamna hi za zela 10.24 a ni. Form 8 hmanga dilna 643 nikuma a luh laiin kumin hian dilna 357 a lut thung a, dilna lut hi za zela 44.48 in a kiam a, Form 8A hmangin nikum khan dilna 192 a lut a, kuminah erawh 128 lutin a kiamna hi za zela 33.33 a ni.

He hunah hian inpawhtlang takin inrawnkhawmna hun neih a ni a. Roll Revision dik leh felfai tak neih a nih chhunzawm zel theihna kawnga tul hrang hrangte ngaihdante thawhkhawma sawiho a ni.