Electoral Roll Observer Pu JP Agrawal, IAS chuan Special Summary Revision 2020 kalpui mek chungchangah nimin (8.1.2020) khan Lawngtlai a tlawh.

Electoral Roll Observer hian Lawngtlai District chhunga special summary revision 2020 kalpui mek a enfiah bakah, Lawngtlai DC Conference Hall-ah Lawngtlaia political party hrang hrang ai awhte chu meeting neihpuiin, electoral roll revision neih mek chungchang a sawipui a. Party ai awhte hian an duh dante a hnenah lo thlenin, electoral roll felfai zawk a awm theih nana hma lakna tur hrang hrangte an sawi ho a ni.

Electoral Roll Observer hian special summary revision neih chhunga Lawngtlai vawi 3 a tlawh turah tun hi a vawi khat tlawhna a ni a. 37/17-College Veng South leh 38/3-Electric Veng-I polling station-te a en nghal bawk.

Special summary revision 2020 atana Lawngtlai District-a assembly bial pathuma draft electoral roll chu December ni 16, 2019 khan tlangzarh a ni a. January ni 1, 2020-a kum 18 tling thar roll-a thun tur emaw, siam that duh emaw neite tan January ni 15, 2020 thleng hun hawn niin, bialtu Booth Level Officer-te kal tlanga dilna theh luh tur a ni a. February ni 7, 2020-ah final electoral roll chu tar chhuah tura ruahman a ni.