Vawiin hian Special Summary Revision of Electoral Roll neih meka Serchhip, Lunglei leh Mamit district Observer, Pu Sangdingliana, IAS, Secretary, I&PR, etc., Government of Mizoram ni bawk chuan Serchhip District a Electoral Roll Special Revision kalpui mek a rawn enfiah a. District Election thawktute leh sawm bik mi pawimawh te meeting a neih pui bawk.

Observer hova meeting hi DC Meeting hall ah buatsaih niin Dr. Lalzirmawia Chhangte, IAS, District Election Officer, Pu Chuauhnuna, Deputy District Election Officer, Pi C. Lalduhzuali, ERO, Pu Vanlalhmachhuana, Election Officer leh Election Branch-a thawktute, khawpui chhunga BLO te, media mite leh mi pawimawh dangte an tel a. Special Summary Revision of Electoral Roll, 2020 kalpui meka thil pawimawh hrang hrang te sawi ho a ni.

Pu Sangdingliana, IAS chuan, Election Commission of India in ruahmanna a siam anga Roll revision neih mek enpuia, harsatna awm thei te, mamawh awm te ngaihthlak sak tura rawn kal a nih thu a sawi a. Roll hi thawk leh khata a pun thut chuan a rinhlelhawm thei a, chutiang bawkin a pung lo lutuk a nih pawhin a rinhlelhawm thei bawk a, chuvang chuan fimkhur taka engkim kalpui a tula, dik taka hna kan thawh a tul thu a sawi a ni. Pu Vanlalhmachhuana, EO in Roll Revision neih meka serchhip district dinhmun report a pe a, tun Revision neih meka dilna lut tawh atanga chhutin Voter’s pun beisei zat chu 1.89% vel a nih thu a tarlang a ni. Report ngaihthlak zawhah kal khawm ten sawihona hun an hmang zui a ni. Sawihona a BLO te ngenna thenkhat, Electoral Roll bua hming inziak hi a font a sin thin a, mit chaklo te tan chhungkaw tin head of family te hming kan zuk hmuh zung zung theih nan Family Serial Number fiah zawka ziah ni se, tih leh; kan Area atanga Area danga pem emaw constituency dang emaw district danga pema, an awm tharna lam Roll-a an inthun tawh leh thun loh te awlsam zawka kan zawn chhuaha an BLO te kan biak zung zung theih nan Mizoram pum huap Booth Level Officer (BLO) te Directory siam ni se, tih te chu Observer hian CEO lamah a thlen sak tur thu a hrilh a ni. Tin, hei bakah hian Rationalisation of Polling Station chungchang te, EPIC tih bo print nawn sak chungchang te, EVP chungchang leh thil pawimawh dang te sawi ho a ni bawk.

Meeting neih zawh hian Observer hian Election Branch a tlawh zui a, checklist hrang hrang te chu thawktute nen an en hova, Serchhip endikna a neih zawh hian Lunglei lam a pan leh a ni.