Vawiin chawhma khan KWFC Godown, Kawnpuiah, Kawnpui Women Farmers’ Club te hnenah ICAR Research Complex for NEH Region, Mizoram Centre, Kolasib hnuaia Tribal Sub Plan kaltlanga pek, Arecanut Moulding Machine, Kuhva kawr atanga thleng siamna khawl hawnna hun neih a ni a, Pi Sangchhin Chinzah, Deputy Commissioner, Kolasib chu khuallian a ni.

Khuallian Pi Sangchhin Chinzah chuan Mizo hmeichhe hlang intelkhawm a, hmasawn tum a hma an la chu entawntlak a tih thu a sawi a, zirna, thiamna leh hnathawh kawngah te pawh Mipa te tih theih ang zawng zawng hi tumruhna leh thawhrimna nen chuan hmeichhia te hian kan ti ve thei a ni, a ti. Pi Sangchhin Chinzah chuan nu mawhphurna pawimawh zia te tarlangin mahni inchhungkhur theuh ah inzirtirna tha neih thin a tul thu a sawi a, zirna piah lamah nungchang mawi, aia upa zah nachang te zirtir fo a pawimawh thu a sawi bawk a ni. Kolasib DC chuan pawl anga thahnemngaih luat avanga inhmuhthiamlohna a thlen chang te a awm thin thu sawiin kan theih chin leh kan phak tawk theuh te inhriatchian a ngaih thu leh kan tlin bak a hmalak tumna chuan buaina a thlen thin thu a sawi bawk a ni.

Vawiin Arecanut Moulding Machine hawnna hun hi Pi R Lalbiakdiki, Chief Volunteer, KWFC in kaihruaiin an hmalakna te a tarlanga, KWFC nuho te chuan Bati siam, Pickle siam, Pa khawi leh Ar vulh thleng an kalpui bak ah NABARD kaltlangin sumdawnna dawr an neih thu a sawi a, thleng siamna khawl dahna tur hian Sawrkar puihna in Godown sak thuai a nih tur thu a sawi bawk. Dr I Shakuntala, Joint Director, ICAR, Kolasib chuan KWFC te chu hmeichhe hmasawn tum tak tak intelkhawm an nih avangin ICAR nen pawh thawh hona a that thu a sawi a ni. He hunah hian ICAR Kolasib a Scientist te, Kawnpui khawtlang hruaitute leh KWFC member te an tel a, Moulding Machine hmang a thleng siam chhinna neih a ni.