Vawiin khan Lunglei District Disaster Management Authority chu an Chairman Lunglei DC Pu V. Lalsangliana, IAS hovin a office chamber-ah an thukhawm. Meeting-ah hian Lunglei DC Office-a Disaster lam changtu official-te bakah PWD, PHE, H&FW, UD&PA leh Police hotute an tel a ni.

Meeting-ah hian chhiatrupna hrang hrang thleng thei laka Lunglei District inpuahchahna thlirho niin Department hotute hian an dinhmun tlangpui leh hmalak tul te report an pe a ni. 

Meeting zawh hian DDMA member-te hi Zotlangah kalin Site Inspection an nei nghal a. Zotlang Khamphei, Jedaz petrol pump bula lei laih mek chu a hmunah kalin an enfiah a. Tin, kawng chhak lam Tourist Lodge thlang, Pu TC Laltanpuia in bul atangin helai hmun hi an enfiah bawk a ni. Helai hmun hi nikum fur ruahtui tlak laia Tourist Lodge panna kawnga lei tlakhniam na thlang maia awm anih avangin Lunglei District Disaster Management Authority-te hian chhiatna lian tham a thlen hma a hmalak vat an rel a. Mipui himna tur ngaihtuaha helai dinhmun hi ngun taka sawiho anih hnu ah hnathawh lai kal mek hi chawl rih tura thupek siam ni se tih Lunglei DDMA chuan a rel a. Tin, hetiang lam mithiam Mizoram sawrkar hnuaia geologist ten rawn enfiah thuai se tih an rel bawk.