Vawiin Inter Departmental Coordination Committee (IDCC) on Registration of Births and Deaths meeting chuan agenda pawimawh tak tak an ngaihtuah zingah birth certificate leh death certificate digital-a tihchhuah tur chungchang an sawiho. Planning and Programme Implementation Department Conference Hall-ah meeting hi neih niin an Chairman, Chief Registrar of Births and Deaths, Dr C.Vanlalramsanga, Secretary, Planning and Programme Implementation Department ni bawk chuan a kaihruai a ni.
Sawrkar laipui Ministry of Home Affairs duh dan angin IDCC meeting chuan birth leh death certificate digital-a siam chu tha a ti a, department lam pawh a inpeih thawkhat tawh tih meeting-ah hian tarlan a ni a. April ni 1 atang chuan digital certificate hi birth leh death ah hman tan ni se, tiin an rel. Mizoram mipuite tana remchanna siam sak tur leh he digital certificate awmzia leh nihphung inhrilhhriat a nih theih nan April 2020 atanga March 2021 thleng hian tuna certificate hman mek hi official thilah pawm a la ni ang a, hemi piah lamah erawh chuan official thil reng rengah digital birth and death certificate chauh pawm a ni tawh ang tiin meeting chuan a rel a ni. He digital certificate hi hman a nih hunah chuan khawi hmun atang pawhin , internet hman theihna apiangah, mahni birth certificate te hi awlsam takin a lakchhuah (download) theih mai tawh dawn a ni.
Mizoram sawrkar chuan Mizoram Registration of Births and Deaths (Amendment) Rules, 2019 a tichhuahah Judicial Magistrate 1st Class tih chu ‘Executive Magistrate’ tia a thlak tak avangin chhan eng nge maw avanga pian hlima in register lo, hun engemaw ti hnua in register-a birth certificate la chhuak leh duhte hnena pek chhuah phalna chu Judicial Magistrate te kutah ni tawh lovin DC office-a Executive Magistrate te kutah a awm tawh dawn a. District tinah DC ten delayed registration khawihtu tur Executive Magistrate te ruat nise tiin meeting chuan a rel bawk.
District thar pathum – Hnathial, Saitual leh Khawzawl DC te chu IDCC member-ah telh ni se, heng District Headquarters tharah te hian District Economics and Statistics Office thar din phalna sawrkarah dil thuai ni se tiin vawiin meeting chuan a rel bawk a ni.
