Vawiin chawhnu dar 1- 4 p.m inkar hian Serchhip District Election Office buatsaihin Serchhip Bazar lun laiah Electoral Roll Special Camp buatsaih a ni a, Electoral Roll Special Summary Revision thar ber, ni 1.1.2017 behchhana tihchhuaha inthun hman lo leh siamthat ngai te tan siamthatna hun an hmang.

He Special Camp hi District Election Officer, Dr. Lalrozama, IAS chuan a tlawh a, hemi pual hian Election Officer Pu R. Vanrengpuia kaihhruaiin inkhawmna tawite buatsaih zui a ni. Dr. Lalrozama chuan, Election Commission of India chuan khua leh tui dik tak kum tling tawhte Electoral Roll ah an chuan loh hi a hlau a, Democracy ram lungphum chu khua leh tui dik takten ram hruaitu zalen taka an thlang hi a ni. Chuvang chuan Election Commission chuan khua leh tui dik tak kumtling zawng zawngte Electoral Roll-a an hming a chuan a, zalen taka ram hruaitute an thlan hlutna an hriat chian deuh deuh theih nan Systematic Voters' Education and Electoral Participation (SVEEP) hi a duang a ni, a ti. Serchhip District mipuite chu Electoral Roll-a inthun ngai pawimawh tur leh a tul apianga lo tanpui turin khawtinah Booth Level Officer an awm zel thu hrilhin, inthun thar leh siamthat kawng tinrengah inthlahrung hauh lova dawr thin turin a ngen a ni. Dr. Lalrozama hian Special Camp-a tel Serchhip khaw chhunga Booth Level Officer zawng zawng leh Election Branch a thawktute chungah lawmthu a sawi bawk.

Vawiina Special Camp ah hian mi thahnem takin an Electoral Photo ID a hming leh thildang dik tawk lote an siamthat tir hlawm a, Special Summary Revision 2017 a harsatna avanga inziak lut hman lo engemawzatin inthun thar an dil bawk. He hunah hian mipuite hip khawm nan lam thiamte an lam bakah a thlawnin Theitui in tur chhawp a ni a, boruak zangkhai tak nen Camp hi kalpui a ni.