Vawiin khan Pre-Conception and Pre-Natal Diagnostic Techniques Act, 1994 (PC&PNDT Act) hnuaia State Supervisory Board chu an Chairman Health Minister Pu Lal Thanzara hovin Chief Minister Office Conference Hall-ah an thukhawm. PC&PBDT Act hi nu pum chhunga nau mipa nge hmeichhia a nih hriat lawk avanga nau tih tlak (female foeticide) awm thin tih tawp anih theih nana duan niin, heihi Sorkar laipuiin India mipui sex ratio (mipa leh hmeichhia intlukna zat) tla hniam lutuk tur ven nan a siam a ni.

Meeting-ah hian Mizorama PC&PNDT Act kalpui a nih dan leh, hemi hnuaia tih tur hrang hrang te tih hlawhtlin a nih dan sawiho a ni a. He Dan in a phut anga Sorkar laipuia Ministry of Health & Family Welfare hnena Quarterly Progress Report thehluh tur chu thlirho a ni a. PC&PNDT Act chungchang hi mipui tam zawkin an hmelhriat theih nan media kaltlanga inhrilhhriatna te neih tawh thin a nih thu vawiin hian tarlan niin, hemi kawngah hian MHIP nen thawk hova, PC&PNDT Act chungchang inhrilhhriatna nei tura hmalakho chungchang sawi a ni bawk.

State Sorkar tin chu Appropriate Authority leh Advisory Committee din tura beisei an nih angin Mizoramah pawh December ni 4, 2015 khan Health & Family Welfare Directorate hnuaiah Appropriate Authority chu din niin, ultrasound centre hrang hrang registration-te, training pek leh enfiahna (inspection)-te a kalpui a. Advisory Committee pawh May ni 26, 2016 khan din niin, thla hnih danah a thukhawm ziah a ni.

Tun dinhmunah Mizorama Ultrasound Centre, PC&PNDT Act hnuaia inziaklut zat awm tawh chu a vaiin 40 an ni a, heng zingah hian State Sorkar hnuaiah 11 an awm a ni. PC&PNDT Act-in inkaihhruaina a duan (standard operation guidelines)-te zawm a nih leh nih loh State Inspection & Monitoring Committee (SIMC) chuan a enfiah thin a; October ni 17-21, 2016 chhung khan inspection neih niin, hemi chhung hian Ultrasound Centre 18 tlawh a ni.