Vawiin hian Lawngtlai District Election Officer Room ah National Electoral Roll Purification and Authentication Programme (NERPAP) kalpui mek chungchang, NERPAP Lawngtlai District Observer Pu Lalhmachhuana, MCS hovin sawihona neih a ni.

Electoral Roll thlitfim leh rintlak zawka buatsaih kalpui mek (NERPAP) chungchang sawiin Pu Lalhmachhuana chuan, sawrkar leh a mipuite indawrna kawng tinrengah Electoral Photo Identity Card (EPIC) hi hman deuh vek a nih avangin EPIC dik, a neitute hming dik tak, pianni leh thil dang dang, a nihna tak anga tarlan a tul a, Election Commission pawhin chutiang nei tur chuan vawiina kan buaipui mek NERPAP hmalakna hi a rawn chingchhuak ta ani.  Hlawhtling taka kalpui a nih theih nan Political Party te, Tlawmngaipawl te nena thawhhona tha tak kan mamawh a, theihtawp min chhuahpui turin kan ngen a ni, a ti.

Election Officer Pu Lallawmawma, MCS pawhin thusawiin NERPAP chungchanga hmalakna te sawiin kumin January atanga June thla thleng khan Lawngtlai East leh Lawngtlai West bial atangin Roll-a inthun thar dilna (Form 6) 394 a luh tawh thu sawiin heng bial pahnihteah hian Adhaar Card hmanga Roll thlitfim 832 a awm tawh thu a tarlang.

Electoral Roll thenfai dan sawihonaah hian khawpui chhunga Political Party hrang hrang aiawhte leh Booth Level Officer (BLO) thlan bikte an tel a, BLO te chuan mipuite chu Electoral Roll pawimawh zia hriaa ngaihven chak deuh turin an ngen a, hun tiam bituk chhunga tihtur te fel taka tihzawh a nih theih nan Last Date niah chauh nilo, ni dang remchang pawh hmang tangkai thin turin an ngen nghal a ni.