Vawiin khan Electric Veng Village Council/ Local Council chuan an din kum 50-na lawmin, he hun denchhana monument an siam chu Parliamentary Secretary leh bialtu MLA ni bawk Pu Lal Thanzara’n a hawng. AMC Ward No. 4 changtu Councellor Pu Rosiamngheta chu Khualzahawm niin Golden Jubilee Souvenir a tlangzarh bawk.

Pu Lal Thanzara chuan Electric Vengin Golden Jubilee an lawm kum a bial changtu a ni chu vannei a intih thu a sawi a. Electric Veng Village Council din a nih tantirh atang tawhin khawtlang hruaitute chu vengchhung hmasawnna kawngah hma an la tha thei hle tih sawiin, development fund an hman kawnga harsatna liantham an tawk ngailo chuan sum enkawl kawngah pawh an rinawm zia a tilang a ni, a ti. Vengchhung huap mai bakah ram pum huap inelna – football, volleyball leh thil dang dangah pawh Electric Veng hi an duailo hle a, heng hi VC/LC-te thahnem ngaihna zar a ni a tih loh theihloh bawk, tiin bialtu MLA chuan a sawi.

Golden Jubilee lawmna inkhawm hi Electric Veng Local Council Chairman Pu F. Saichhunga’n a kaihruai a. VC member mualliam tawhte sunna hun hman niin, VC member hlui te hnenah chawimawina thilpek hlan a ni a, Local Council Secretary Pu  P.C. Lalrinkima’n Electric Veng Village Council/ Local Council chungchang report a pe bawk.

Electric Veng Village Council inthlan hmasa ber chu 17th September, 1963 khan neih a ni a. Din tirh a nih atang tun thlengin member 74 an awm tawh a ni.