Vawiin khan Synod Conference Hallah Joint Electricity Regulatory Commission (JERC) for Manipur & Mizoram leh P&E department tangkawpin a vawikhatna atana ’ Conference on Electricity & Related Issues Sensitization in Mizoram’ an buatsai chu Chief Minister Pu Lal Thanhawla chuan a hmanpui.

Chief Minister chuan hmarchhak bialin power tam tak a siam chhuak thei tih hi central sorkar pawhin a hria a, mahse anih tur anga kalpui theih loh avangin power kan khawpkham lo hle a ni a ti a.Kan engineerten tam zawk power kan neihna turin theihtawp an chhuah reng a ni a ti a. Megawatt tam berpechhuak thei tur Tuirial Hydel Project chu nakum 2016ah hman theih a beiseiawm a ni a ti.

Chief Minister chuan chak taka hna thawk duh mahila, kuttlinglova sum lak duhna avangin duh angin a kal chak theih loh a ni a ti a. Project lian kan neihte a ti thuanthu a, nakum 2016 a relin Sairang rawn chhun thei tura ruahman pawh kum 2018 ah Sairang a lo thleng thei ang em kan ti a ni a ti a. Chuvangin tuanah hian khauh taka kalpui turin Land Reforms kan buaipui mek a ni a ti a. Dan khirh tak kan neih a tul a ni a tiin, Power Policy fumfe leh tha tak nei turin engineerten tunah hian an duang mek a ni a ti.

Power transmission leh distributionah power kan hloh nasat thin avangin renchem taka kan hman a pawimawh tih Pu Hawla chuan sawiin, mipui power hmangtuten inrenchem thiam hriat a, inzirtir kan uar a pawimawh hle a ni a ti. Chief Minister chuan Mizoram hi power tariff (chhiah) rampuma tlem ber anih thu sawibawkin, state pachhia nih kan duh lo a, hmasawnna kan duh anih chuan chhiah kan lakte hi a tul anga siam a tul ang a ti. JERC hotuten pisa nghet tur an ngenna chu Chief Minister chuan an dilna a hriatthiampui thu leh tun dinhmun rihah chuan a harsat avangin lo hriatthiampui turin a ngen bawk a ni.

JERC Chairman Pu R.K. Kishore Singh chuan State Electricity Regulatory Commission hi Electricity Act, 2003 in a phut angin state tinin an nei tur a ni tiin, Manipur leh Mizoram erawh chuan Power Ministry rawn angin Manipur leh Mizoram chuan an inkawp a ni a ti a. Kum 2008 atang khan Commission ah hian member pahnih ve ve an neih tan thu a sawi bawk a. Manipur state chuan kumin khan Electricity Department chu ‘corporatized’ anih thu tarlangin, Manipur State Power Company Limited leh Manipur State Power Distribution Company Limited ah then a nih thu sawiin, Managing Director ve ve in an enkawl a ni a ti a. Sum hman tih tlem nan Mizoram pawhin ti ve se a duhthu a sawi bawk a ni.

Sensitization programme ah hian Engineer hrang hrangten thupui thlan bikah powerpoint hmangin programme chhimtute an hrihfiah a, sawihonate neih a ni bawk a ni.