Vawiin ni 27 October 2015 chawhma dar 10:30 khan Chhimveng Hall Mamit-ah MZP Headquarters Mamit buatsaihin Zirlaite Ni hman a ni. He hunah hian Pu Vanlalngaihsaka, District Bawrhsap chuan Khuallian niin a hmanpui.

He hun hi Christopher Lalmuankima Secretary MZP Headquarters Mamit chuan a kaihruaia. Pu Hmartawnluaia Vaiphei Adviser MZP Headquarters Mamit in Hunserh a hmangin, Govt. Mamit College Students' Evangelical Union Choir ten Opening song an sa bawk. Khuallian chuan thusawiin, 'MZP Headquarters Mamit in hetiang zirlaite ni an buatsaih thei chu a finthlak a tiin lawmawm a ti hle a, Mamita zirlaite chu thahnemngaitak leh tih tak zet a an zirlai zir turin a fuih a, tunlai khawvel intlansiakna sang takah hian hlawhtling turin taimak leh tawrhchhel a ngai hle a ni a ti a, Mamit atang hian MCS, MPS, Doctor a chhuah ve theih a ni tih hrereng turin leh Civil Service line chu zirlaiten antui a nih chuan bawh hram hram turin a ti a ni.

He hunah hian Pu Lalropuia President MZP Headquarters Mamit pawhin thusawiin, Zirlai kalkhawmte chu Zirlaite Ni leh MZP kum 80 na chibai a buk a, MZP Headquarters Mamit chu kum 1994 khan Mamit Headquarters din a nih thu a sawi bawk. MZP President chuan, zirlai kalkhawmte chu nakin lawka kan ram leh hnam innghahna tur a nih vangin nupui, pasal zawn chungchangah pawh tun atanga fimkhur turin leh, Mizo mipa te chu Mizo nula tana neih chakawm tur khawpa dinhmun siam turin leh engkawng pawh zawh ila hlawhtling thei tur khawpa taimakna, huaisenna, dikna nena ngaihtuahna siam tur a chahin, HSLC leh HSSLC zirlaite chu Mamit bialtu MLA Pu John Rotluangliana'n a bial chhung atanga ah Top 10-a lang an awm chuan Laptop a pek dawn dawn thu a sawi a, chumi dawngthei tura an zirlai ah tang nasa turin a fuih a ni.

He hunah hian Pu Lalmuanpuia Sailo STAM member leh Pu P.Lalthara Chairman Joint V/C Mamit ten thusawina hun an nei bawk a ni. He hunah hian Mamita zirlaite chuan zai, lam leh an thiam thil hrang hrang entirin chawhnu lamah Variety Programme hlimawm tak an hmang a. MZP Headquarters Mamit in kum 2015 School of The Year lawmman sem niin, Govt. Higher Secondary School Mamit chu MZP School of the year 2015 ah thlanni in, lawmman hi Pu Micky R.Lalenkawla, DPC SSA Mission Mamit chuan a tum a ni. Mamita Zirlaite Ni hmanna ah hian Mamit khawpui chhunga High School leh a chunglam zirlaite an kal tha hle a ni.