Vawiin khan NLUP Implementing Board (NIB) Chairman Pu J. H. Rothuama chuan Kolasib Project Veng a NLUP Market Shed sak a hawng a. Hemi hnu hian NLUP Market Shed hawnna puala programme tawi DIPRO Conference Hall, Kolasib ah neih zui nghal a ni.

He programme Kolasib Additional DC Pu R. Lalremsanga kaihhruaiah Pu J.H. Rothuama chuan NLUP tum ber chu Mizoram mipuite, a bik takin ei leh bar lama intodelh theihna tur atana hmalak leh puih te, hausa leh rethei inkara inthlauhna awm tih reh tuma khairual leh mitinin eizawnna nghet leh rintlak an neih theihna tura atan theitawpa tan lakpui te a ni, a ti a. Kawng hrang hrangin NLUP hlawhtlinna pawh hmuh choh zel anih thu a sawi bawk.

NLUP tum, hmalakna leh hnathawh te chu a that leh rintlak zia hriain UN agency chuan a rawn ngaihven a, tunah chuan UN agency intelkhawm te chu Aizawl ah hmunpui neiin NLUP tih chak leh tih phuisui zel nan hma lak an tum thu Pu J. H. Rothuama hian a sawi. Mamit leh Kolasib District te chu a hmunhma te'n a zir avangin NLUP chu a hlawhtling hle nia a hriat thu a sawi a. Heng District-a sangha dil, oil palm cultivation, rubber leh hmunphiaha an hmalakna leh an thawhchhuah te chu a chhuanawmin a entawntlak hle a ni, a ti. AH & Vety Department in phal taka NLUP Market Shed sakna atan an ram an sahtlak chu lawmawm tiin Department chunga lawmthu a sawi bawk.

He programme ah hian Kolasib DC Pu Jitender Yadav pawhin thusawiin NLUP hian a huam zau a, hetiang mipui huapzo programme hi state dangah a la awm ka ring lo ni, a ti a. NLUP kaltlang hian nasa leh zawka Mizoramah buh leh thlai hrang hrang tharchhuah a pun ngei a beisei thu a sawi bawk.

NLUP Market Shed hi RCC a sak niin chawnghnih a ni a (a chung rangva), basement a awm bawk a, cheng nuai 20 a sak zawh niin a hnung lamah tanky leh inthiarna te a awm a, a area hi hung a ni bawk. He Market shed ah hian mi 18 vel inpho thei tura ruahman niin a dung hi feet 40 leh avang hi feet 15 a ni.

He programme ah hian NIB Secretary Pu James Lalrinchhana chuan Line Department hrang hrangte zawhna changin rawtna an siam te chu a theih ang ang kalpui an lo tum ang tih a sawi bawk. NIB Chairman hi Pu David L Thangliana, Chief Media Officer, NLUP in a tawiawm a ni.

Programme hi Pi K. Vanlalruati, SDO (Sadar) chuan lawmthu sawiin a khar a ni.