1393/2023-2024

Khawzawl 4th August, 2023 : Vawiin khan Pu VL. Malsawma, Deputy State Project Director, Samagra Shiksha chuan Govt. Middle School - 2, Khawzawl Vengthar a cheng nuai 118 senga Elementary Girls Hostel, Netaji Subhash Chandra Bose Awaslya Vidyalaya sakna tur hmun chu a tlawh a, Elementary Girls Hostel sak tur hi nikum khan pawm alo ni tawh a ni.

Pu VL. Malsawma chuan Sawrkar School zingah ram nei tha an tam tawh loh avangin School tichangtlung tur pawhin hmalak a harsa tawh a, Laboratory cum Workshop ang te pawh siam dawn se, siamna tur ram nei an tam lo tih a sawi a. Khawzawl pawh School ram nei lo ber zingah an tel thu leh Govt. Middle School -2 ah Elementary Girls Hostel sakna tur ram a lo la awm hlauh chu vanneihthlak a tih thu a sawi a. Hostel sak zawh fel hunah Hostel a awm naupangte hian Stipend te an dawn tel dawn avangin hei hian zirlai pawh nasa takin a tihpun theih a beisei tih a sawi.

Dy. SPD chuan Vocational Course chungchang pawh sawiin Samagra Shiksha hnuaiah Sawrkar School a Vocational Course 1 kalpui turin Class 9-ah zirlai 25-30 an awm a ngaih thu leh NEP hnuaiah Vocational Course kalpui vek tur a tih ni mahse Class 9-ah zirlai 20 vel chauh an awm chuan a kalpui theih chuang lo tih a sawi.

Dy. SPD hi Pu Dennis Lalhlimpuia, P.O. (Civil Work), SPO, Samagra Shiksha in a tawiawm a. Khawzawlah hian Dy. DPC Pu K. Thantluanga leh BRCC Pu PC Rosiama te bakah MJA Member ten an tawiawm a ni.