2573/2026-2027

Dated Aizawl, the 08 October 2026: Vawiin khan Sawrkar Laipui Ministry of Labour & Employment hnuaia Employees State Insurance Corporation (ESIC) hotute buatsaihin I&PR Auditorium, Treasury Square-ah, ESIC Scheme chungchang zau zawka zirhona hun ‘mega-campaign on Employees State Insurance Corporation’ hun hman a ni a. Pu Saumyaketu Mishra, Special Secretary LESDE chu khuallian a ni.

He hunah hian khuallian Pu Saumyaketu Mishra, Special Secretary, LESDE chuan thusawiin, Employees’ State Insurance Scheme zau zawka inhrilhhriatna hun hman a ni chu a lawmawm a tih thu a sawi a. India ram chu mi tinin an dikna chanvote an hmuh thiehna ram a nih angin, ESI chu eng hnaah pawh a ruaitute leh a thawk ten hamthatna tam tak ‘social security’ an nei a ni tih hre chunga ngaihngam taka hna an thawh ve theihna tura Sawrkar Laipui Scheme a ni tih sawiin, mipui vantlangin zau zawka an hriat zel theih nan theitawp chhuah zel turin thawktute chu a fuih a. Kalkhawmte chu Scheme pawimawhna leh Scheme hnuaia hamthatna hrang rhangte pu darhtu nih tum theuh tura chahin, mega-campaign chu hlawk taka hmang theuh turin duhsakna a hlan nghal a ni.

Employees' State Insurance Corporation (ESIC) hi Ministry of Labour & Employment, Govt. of India hnuaia Statutory Body niin, Mizoram bikah chuan Employees' State Insurance (ESI) Act hi Aizawl Municipality huam chhungah kalpui turin December ni 1, 2015 khan hmalak a ni a. Aizawl district pumpuiah January ni 24, 2023 atangin kalpui tura hmalak chhunzawm a ni bawk a. Tunah hian ESI Scheme hi Mizoram puma District zawng zawngahte implement tawh a niin, 09-Oct-2026 hian Kolasib Branch Office pawh hawng tura inruahman mek a ni.

ESI scheme hi ESI Act 1948 in a huam hnathawktute zingah, damlohna/bawrhsawmna avang te, nau neih (Maternity) avangin emaw, hliam avanga hnathawk thei lo leh an hnathawhna kaihhnawiha nunna chan an awmin, anmahni bakah anmahni rinchhana khawsa (dependents) ten hamthatna chi hrang hrang damdawi ina inenkawlna, pension, ralna thilpek leh a dang thahnem takte an dawn theihna tura Sawrkar Laipui Scheme a ni a. ESI Scheme a inziah luh hi Sumdawng leh Mimal eizawnna vanga mi 10 leh a aia tam ruaite chuan tih ngei tur a niin, heng aia tlem ruaite pawhin mahni duh thua tih theih a ni bawk a. He scheme chhawr tangkai tur hian hnathawkte chuan thla tin an hlawh atanga .075 percent an thawh tur a ni a, a ruaitute pawhin an mirawihte hlawh atanga chhuta 3.25 percent thawh ve bawk tur a ni.

ESI Scheme chuan sumdawnna (Establishment/Factory) hrang hrang Road Transport, Hotels & Restaurants, Newspaper, dawr chi hrang hrang, leh Educational/Medical Institution bakah a dang tam tak, hnathawktu 10 emaw a aia tam chhawr reng rengte chu a huam vek a. Hnathawktu thlakhata Rs. 21,000/- leh a aia tlem hlawhte tan heng hamthatnate hi ruahmansak an ni bawk.

Vawiina mega-campaign-ah hian Regional Office, Guwahati atangin Insurance Commissioner, Pu A.K. Sahu te, Regional Director Pu Champak Biswas leh Senior Officer dangte bakah  Mimal sumdawng leh pawl hrang hrang hotute leh thawktute thahnem tak an kal khawm a. Hun hman hi Pu Champak Biswas, hmar chhak bial Regional Director, ESIC chuan kaihruaiin kalkhawmte lawmna thu a sawi a. Dr. Muanpuii Pachuau IMO ESIS Dispensary Aizawl-in ESIC hnuaia Dispensary an kalpui dan te a sawifiah a. Pu David Lal Fakzuala, Assistant Director, Camp Office, Aizawl leh Pu Ahtesham, Deputy Director, ESIC NE Regional Office-te chuan chipchiar takin kalkhawmte hi ESI Scheme chungchang an zirtir bawk a ni.