2574/2026-2027

Aizawl, the 8th October, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin chawhma khan Lianchhiari Run, Directorate of I&PR, Aizawlah Pu C. Zâma, Mizo National Army (MNA) member hlui lehkhabu, sap tawnga ziah "The Escape" chu Khuallian niin a tlangzarh.

He huna thu sawiah Larsap General (Dr) Vijay Kumar Singh chuan Pu C. Zâma'n a thil hriat leh tawnhriatte tha taka chhinchhiaha lehkhabu a siam chu fakawm a tih thu a sawi a. Thangtharte hriat atana Mizo chanchina thil thleng pawimawhte ziaka dah zel a tul thu sawiin, hun a kal zel anga Mizo chanchin ziahna lehkhabute hi an la hlu zual deuh deuh dawn a ni a ti. Hun engemawchen ram buaiin a chim hnuah Mizoram chu tunah chuan State ralmuang, hmasawn leh ziak leh chhiar thiam vekna kan nih tak thu sawiin, midangte aiin tlai hret mah ila, remna leh muanna hrin chhuah hamathatna hrang hrang kan nei a, hei hian hmasawnna rahbi thar a rawn thlen a ni a ti. Larsap chuan hmasawn zel turin hawiher tih zau leh mahni awm hmun atanga chet chhuah a tul thu sawiin, hmasawn turin midangte nen kan inpawhtawn a tul, hmun dang atanga kan thil zir leh tawnhriat tha ber berte hi kan state tihhmasawn nan kan hmang tangkai thei a ni, a ti bawk.

He hun hi Prof. (Dr.) Ginlianlal Buhril, Vice Chancellor, ICFAI University, Mizoram chuan kaihruaiin, lehkhabu ziaktu Pu C. Zâma, Deputy CM hlui Pu Tawnluia leh Ex-MNA te atangin an tawnhriat ngaihthlak a ni a. Pu Vanlalruata Ralte, Owner, Book Cafe-in lehkhabu thlir lawkna hun a hmang a. Home Minister hlui Pu Lalchamliana'n lawmthu sawiin hun hman a khar a ni.

The Escape lehkhabuah hian Mizoramin zalenna a sual hun lai 1966-1986 inkara thil thleng leh tawnhriatte thai lan a ni a. Phek 174 a chhah niin, bu khat hi Rs 200/- man a ni.