Mizoram Entrepreneurship Development Monitoring Committee (MEDMOC) leh Confedaration of Indian Industry (CII) buatsaihin vawiin nileng khan Aijal Club ah Entreprenuership Conclave 2018 neih a ni a. Planning Minister Pu Lalsawta chu khuallian a ni.

Pu Lalsawta chuan agriculture leh a kaihhnawih thil dangah lehkhathiam leh a ngaihna hria, mi taima leh thawk tak tak ten eizawnna tha an neih a, hlawk zawka thar chhuah an tih ral theih nan New Economic Development Policy (NEDP) hmangin sawrkarin hma a la mek, a ti a. Mizoramah chuan sawrkar hna thawh chu eizawnna tha nia ngaiin mipuiin kan bawh a, mahse sawrkar hna hian mi zawng zawng a daih si loh avangin eizawnna tha zawk leh hlawk zawk kan zawn a tul, a ti a. Pathianin ram tha, engkim that duhna hmun Mizote a pe a, hei hi kan hman tangkai a tul a ni, a ti. Minister chuan ngaihtuahna ngunthluk zawka hmanga thar chhuah tihpun, thlai thar hralhna hlawk zawk hmuh leh thar chhuah dahna hmun tha siam chhuahte chu thil pawimawh a ni a. Lehkhathiam hna hmulote harsatna su kiang tura thawh theih hnai vai ber chu agriculture hi a ni, tiin contract leh organic farming hi tih tak zeta kan beih chuan eizawnna hlawhtling leh hlawk takah kan siam thei a ni, a ti bawk. 

MEDMOC Alternate Chairman leh Planning Secretary ni bawk Pu C.Vanlalramsanga pawhin thu sawiin NEDP kaltlanga sawrkarin hmalakna liantham a neih mek laiin contract leh organic farming lama sum leh pai peipunna lam hawi Entrepreneurship Conclave buatsaih a ni chu thil inhmeh leh tangkai tak tur a ni, a ti a. Ram changkangah agriculture leh a kaihhnawih eizawnna hi sumdawnna hlawk tak a nih tawh laiin ram thang mekah chuan mi tam takin kalsan an tum eizawnna hlawkloah an ngai a, chuvangin sum peipunna tha leh eizawnna hlawka siam turin ngaihtuahna thar senga kawng inkawhhmuh a ngai nasa hle a ni, a ti.

Entreprenuership Conclave 2018 ah hian sawrkar mi pawimawhte leh zirlai, sumdawng leh farmer-te an tel a. Mi thiam rual ten thupui thlan bik hmanga thu an sawi bakah sawihona hun an hmang bawk.