532/2023-2024Dated 

Aizawl the 22nd May 2023: Vawiin khan Environment, Forest and Climate Change Minister Pu TJ Lalnuntluanga chuan International Day for Biodiversity 2023, IASE Auditorium Republic Veng a neih chu a hmanpui.

He International day for Biological Diversity lawmnaah hian EF&CC Minister Pu TJ Lalnuntluanga chuan thusawiin International Biodiversity Day chu kan khawvel sik leh sa inthlak danglam chho zel leh nungchate dinhmun en hian Khawvel a hun pawimawh ber pawl a ni, a ti a. Khawvel ah thiamna a sang chho zel a, amaherawhchu kan environment lah nasa takin a inthlak danglam a, hei vang hian, hmasawnna leh environment humhalh hna chu in su buailo a, a kalkawp theih nan thiamna sang tak bakah moral dik kan neih a pawimawh a ni, a ti.

Pu TJ Lalnuntluanga chuan mi thenkhat in thil a chhe lai ringawt sawiin a tha lam zawng kan hmuh hmaih leh thin chu pawi a tih thu a sawi a. Kan rama thing leh mau leh nungchate enkawlna kawngah pawh Forest Department leh Environment pawl chi hrang hrang te in hma chak takin an la a, Biodiversity Board te din niin, Forest act hrang hrang leh lui tui humhalh kawngah pawh dan mumal tak kan nei a,hemi kawnga hmasawnna pawh a kal chho zel a ni, a ti. Minister chuan environment leh Biodiversity enkawl hna chu sawrkar, pawl leh mimal thawhhona a pawimawh takzet a, chuvang chuan Mizoram hi ram nuam zawka kan siam theih nan kan za a kan mawhphurhna theuh te hria a kan tanrual a ngai a ni, a ti bawk.

Vawiin a International Day for Biological Diversity day lawmnaah hian Pu RK Singh IFS, Principal Secretary & PCCF Mizoram state Biodiversity Board Chairman chuan thu kamkeuna sawiin Biodiversity humhalh pawimawh zia leh a enkawl zui dan tur chu kan in hrilh chhawn zel a pawimawh a ni, a ti. Prof. Lallianzuali Fanai, IASE Principal pawh in lawmna thu sawina a nei a, Prof. John Thanzama, Bio-technology Head of Department, Mizoram University in PowerPoint presentation a pe a, Biodiversity chi hrang hrang species diversity, genetic diversity, ecosystem diversity chungchang leh Mizoram-a biodiversity Conservation lama kan mamawh thil pawimawh tak tak te tarlangin kalkhawmte zirtirna a pe a ni.

EF&CC Minister hian Biodiversity day denchhen a Painting leh quiz competition lawmman semna a nei nghal a; Painting competition ah hian Lalchhanhimi Hnamte, Mount Carmel Higher Secondary School Aizawl chu Pakhatna niin Lalpekmawii Chawngthu leh C Vanlalremruati MICE chu quiz competition ah pakhatna an ni thung a ni.

International Day for Biological Diversity hi kum tinin May 22 ah hman thin a ni a, kumin atan hian 'From Agreement to Action: Build Back Biodiversity' tih chu thupui(theme) atana thlan a ni. Vawiin a program ah hian EF&CC Minister bakah Pu RK singh, Principal Secretary & PCCF, Pi Lallianzuali, Principal IASE, Mizoram State Biodiversity Board Ex Officio leh expert Member te, Biodiversity Management Committee te, EF&CC Department Officer leh staff te, IASE students leh Staff te leh Environment NGO hrang hrang te an tel a ni.