Environment & Forests Department chuan February ni 4 (Thawhtan Ni) khan Marpara Community Hall-ah Marpara South leh a chhehvel khua – Marpara ‘S’ I, Marpara ‘S’ II, Terabonia, Salmur, Phainuam leh Sachan a NLUP hnuaia Bamboo Trade thlangtu, beneficiaries chhungkaw 298 te hnenah NLUP tanpuina an sem a, Sports Minister leh Thorang bialtu MLA ni bawk Pu Zodintlunga’n tanpuina hi beneficiaries te a hlan a ni.

Pu Zodintluanga chuan beneficiaries ten an trade thlan theuh ah mahni thu thu a kalpui lovin line department te thiamna hmang tangkai a, an thurawn ang leh an zirtirna leh ruahmanna anga ti thin turin a chah a, chutianga ti te chu an vannei ang a, hlawhtlinna pawh an hmu sang zawk dawn a ni, a ti. Trade thenkhata instalment pek chu tam a tih thu sawiin, hei aia tlem leh instalment zing zawka pek ni ta se, a dawngtuten hei ai hian an hlawhtlin pui zawk theia a rin thu a sawi bawk a ni.

Pu Zodintluanga chuan NLUP kaltangin Mizoram hmun hrang hrangah chhungkaw tam takin hlawhtlinna an hmuh chhoh mek thusawiin, beneficiaries te trade thlan a zirin cheng sing fe an la lut tan tawh a ni a ti a. NLUP 1st phase-a tanpuina dawng zingah thenkhat ti thalo an awm chu pawi tiin 2nd Phase a tanpuina dawng te chu line Department ten tun aia uluk leh chik zawkin an tih that dan an en dawn a, a ti thalo leh pek tlak loh a an ngaih te chuan instalment an dawng zui dawn lo a ni a ti bawk.

NLUP chu 3rd Phase thleng kalpui anih tur thusawiin mi taima tak ni si, an thiam loh hrim hrim avanga hlawhchham te tan Sawrkarin exit protocol a duang mek a, mahse mi thatchhia leh tanpuina hmang dik lo te tan exit protocol hi ruahman a ni lo a ti. NLUP dawngtute an hlawhcham hlauh avangin line department ten ramhnuaiah te pawh an vil reng thin chu lawmawm a tih thu sawiin a dawngtu te chu taimakna, rinawmna leh tih takzeta an trade thlan ah te theihtawp chhuah turin a fuih bawk a ni.

Bamboo Trade hnuaia NLUP 1st Phase-a 4th & Final Instalment tanpuina hi chhungkaw 196 (Terabonia ah chhungkaw 14; Marpara ‘S’ I leh Marpara ‘S’ II ah chhungkaw 60 ve ve; Salmur ah chhungkaw 20; Phainuam ah chhungkaw 12 leh Sachan ah chhungkaw 30) te hnenah Rs. 21, 985/- zelin hlan an ni a, he phase a sum sem zat chu a zavaiin Rs. 43,09,060 a ni. 2nd Phase 1st Instalment tanpuina hi chhungkaw 102 (Terabonia ah chhungkaw 4; Marpara ‘S’ I ah chhungkaw 38; Marpara ‘S’ II ah chhungkaw 40; Salmur ah chhungkaw 10 leh Phainuam ah chhungkaw 10) te hnenah Rs. 38,826 zelin hlan an ni bawk, tichuan he phase a sum sem zat chu Rs. 39,60,252/- a ni. Phase pahnih belhkhawma sum sem zat chu Rs. 82,69,312/- a ni.