Nimin khan ni hnih chhung awh tur(5 – 6 February) Young Chakma Association (YCA) Zonal Conference vawi 4-na chu YCA Site Marpara ‘S’ ah tan a ni a, nimina Conference hawnna inkhawm neih chu Sports Minister leh Thorang bialtu MLA ni bawk Pu Zodintluanga’n a hmanpui a ni.

YCA Zonal Conference hawnna ah thusawiin Pu Zodintluanga chuan NLUP leh Sawrkarin a duan hmasawnna programme hrang hrang tih hlawhtlin kawngah tlawmngai pawl te chu an pawimawh em em a ni, a ti a. YCA hruaitute chu anmahni khua ah theuh heng a bikin NLUP a ti tha lo te chu, political party leh VC ten an hauh ngam loh pawhin, hau thin tur leh kawng dik zawk kawhhmuh a hmasawnna reng reng an nihna ang taka a thlen theih nan tan la a, fuih thin turin a ngen a ni.

Sazep tlang dunga khaw 8 ah upper primary school(UPS) din anih thu sawi langin hnam dinchhuahna kawngah zirna hian hmun pawimawh tak a luah thu leh hmasawnna kawng tinreng ah zirna in nghawng thui tak a neih thu Pu Zodintluanga hian a sawi a. Pu Zodintluanga chuan Sawrkarin hmasawnna atan kawngpui tha neih a pawimawh zia a hria a, chuvangin W. Phaileng to Marpara Road chu chak taka siamthat mek a ni a ti.

Electoral Roll-a ram dang mi (foreigners) an chuan in harsatna a thleng thin a tiin Pu Zodintluanga chuan YCA chu Electoral Roll siam lai in inrawlh thin tur leh Mizoram khua leh tui dik tak chauh Electoral Roll-ah an chuan theih nan tan la turin a fuih bawk a ni. Conference hlawhtling taka an hman theih nan leh Conference in rah tha a chhuah theih nan Pu Zodintluanga hian duhsakna a hlan bawk a ni.

Conference hawnna inkhawm ah hian Chakma hnam lam entir a ni a, chawhnu lamah rorel inkhawm an hmang a. Zonal YCA Conference ni hnihna hi Pu Lalrobiaka, MLA leh ZIDCO Chairman ni bawk leh Pu Nirupam Chakma MLA ten an hmanpui a ni. YCA hi kum 1978 khan din niin Kamlanagar chu Central YCA headquarters a ni a. Central YCA hnuaiah hian Zone 7 an awm mek a, Marpara YCA Zone hnuaiah hian Branch 13 an awm mek bawk.