No.4298/2021-2022
Aizawl 17th March 2022 : Nimin chawhnu dar 3 khan Er. H. Lalzirliana, Bialtu MLA/Vice Chairman, Road & Infrastructure Development Board hovin a Office chamber-ah Mamit District chhung Dapchhuah- Tuipuibari inkar kawng siamthat mek leh NH44A kawngpui siamthat leh hnathawh mek chungchangah meeting pawimawh tak neih a ni.

Meeting-ah hian Dapchhuah khua atanga Tuipuibari inkar kawngpui BRO Road hun rei tak neitu awmlo ang mai a enkawl loh leh chei hnum ngai tawh loh chu Border Roads Task Force (BRTF) te'n siam mek a ni a. BRTF hotute hnen atanga hnathawh kal lai mek chungchanga an hmalak tawhna hrang hrang leh hmachhawp te tarlan a ni. Dapchhuah atanga Tuipuibari hi Mizoram khawthlang lam inkalpawhna kawng pawimawh tak pakhat a nih avangin hna hi tha tak leh a hma thei ang bera zawh fel a nih theih dan tur meeting-ah hian sawi ho a ni.

He meeting-ah hian NH 44A hmalakna kal mek chungchang sawi niin, Revised Estimate Ministry of Road Transport and Highways-ah kum 2 lai tang tawh chu chinfel a nih tawh avangin NH44A kawngpui siam hna chu chak tak leh ngawrh taka chhunzawm nghal a nih thu kawngpui siam hnathawktu M/s Ratna Infrastructure Private Ltd Vice President chuan a tarlang bawk.

NH44A leh Dapchhuah khua atanga Tuipuibari kawng siam hna thawk mektu Construction Company-te chu chak tak leh tha taka hna kalpui zel turin Board Vice Chairman chuan a hrilh a. Heng kawngpui siam hna thawk mektu company-te chu an hnathawh mek ah a tul anga Board leh Department pawhin an en zui reng tur thu a hriattir bawk.

He meeting-ah hian BRTF leh Ratna Infrastructure Private Ltd. hotu pawimawh te bakah Public Works Department (PWD) Govt of Mizoram hotu pawimawh tak tak te an tel a ni.