No.4299/2021-2022

Aizawl dated 17th March 2022: Vawiin khan Planning & Programme Implementation Department hmalaknain I&PR Conference Hall, Kolasibah ‘Workshop On Implementation, Monitoring & Localization Of Sustainable Development Goal’ buatsaih niin ‘Sustainable Development Goals’ chungchang zirchianna, kalpui a nih dan leh sawt zawk a kalpui a nih theih nana hriattur pawimawh inhrilhhriatna hun hman a ni a. Pi H.Lalremmawii, District Planning Committee & District Research Officer, Kolasibin hun kaihruaiin Dr. Vanlalzawna, Consultant, Planning & Programme Implementation chuan zirtirna a pe a ni.

Dr. Vanlalzawna, Consultant chuan ‘Sustainable Development Goals’ chu khawvel hrisel leh tha zawk siam nana United Nations hnuai a ram hrang hrang ten kum 2015 atanga 2030 chhung a hmachhawp an siam a nih thu a sawi a. heng hmachhawp hrang hrangte tihlawhtling tur chuan mahni dinhmun inhriatchian hmasak a tul thu leh Sawrkar department, NGO, khawtlang hruaitute leh mipui thawhhona a pawimawh thu a tarlang bawk a ni.

India rampum ah Mizoram chuan tehfung hrang hrang hmang a endiknaah dinhmun 12-na a hauh mek thu te, ‘Most Improving State’ nihna a luah mek thu te leh hmarchhar state chhung a district 103 zingah Serchhip district chuan dinhmun 5-na a hauh mek thu tarlan a ni a. Mizoram district zingah Kolasib chuan dinhmun 3-na a hauh mek bawk a ni.

Sustainable Development Goals (SDGs) chu ram hrang hrang inzawmkhawm pawl United Nations hnuaia ram 193 ten kum 2015 a lungrual tak a hmasawnna kawng hrang hranga thawhhona tur atana thuthlung an ziah niin, kum 2030 hmaa hmasawnna thlen tum chin (Goals) sawm leh pasarih (17) te sawina a ni. India ram pawh thuthlung ziaktute zingah hian telin, Sustainable Development Goals (SDGs) in a tum ber chu hmasawnna ngelnghet, tha leh tlo, tuchhuan lo la awm leh zel tur te tan pawh a chhenfakawm hmasawnna kalpui a ni.

He Sustainable Development Goals hi United Nations (UN) khawmpui lian (General Assembly) 25th September 2015 New ber 70th Summit York, United States of America a neih chuan official agenda ah neiin thupui chu ‘Transforming our World: the 2030 Agenda for Sustainable Development’ tih a ni a, Goal hrang hrang 17 a awm. Kum 2015 kum tawp a pawm chauh a nih avangin a tak a hman tan hun erawh 1st January 2016 a ni thung.

United Nations (UN) hian SDGs hma hian Millenium Development Goals (MDGs) chu kum 2000 atanga kum 2015 thleng khan a lo kalpui tawh a, Goal 8 leh target 21 leh indicators 60 thlang chhuakin ram 189 te an tel a, amaherawh chu MDGs hi a hun a lo tawp avang leh MDGs chhunga goal leh targets tin te tihhlawhtlin hmabak ala nih avangin ram hrang hrang 193 intelkhawm pawl United Nations chuan hmasawnna zau zawk leh funkim zawk a kalpui tha an ti a, tichuan Sustainable Development Goals hi kum 15 chhung atana kalpui tur atan an pawm ta a ni.

SDGs Goal hrang hrangte:
Sustainable Development Goals hian min thlenpui a tum goal hrang hrang 17 neiin a huamzau hle a, heng goal 17 te hi hlawm lian tak Pathum ah then theih a ni. Goal 1 atanga Goal 6 na thleng hian mipui mimir lam hmasawnna (Social) lam a kawk a, Goal 7 atanga goal 11 na hian ei leh bar kawnga hmasawna leh khawpui hmasawnna (Economic) lam thlurin goal 12 atanga goal 15 hian kan chhehvela awm ramsa leh ramngaw, sik leh sa (Environment) humhalh leh venhim lam a hawi a ni. Goal 16 leh goal 17 te erawh hi chuan remna leh muanna a awm theihna tur leh he goal hrang hrang te hlawhtlinna tur atana thawhona te a kawk a ni (Fostering Peace and Partnership).

Sustainable Development Goals (SDGs) hrang hrang te chu:
1. Retheihna umbo (No Poverty)
2. Chhuanchham awmlohna (Zero Hunger)
3. Hriselna leh nunkhaw nawmna (Good Health and Well and Being)
4. Zirna tha leh rintlak (Quality Education)
5. Mipa leh Hmeichhe intluktlanna (Gender Equality)
6. Tui thianghlim leh faina (Clean Water and Sanitation)
7. Man tlawm zawk leh leilung hauhsakna tichereu lo zawnga kawlphetha siam leh hman (Affordable and Clean Energy)
8. Eizawnna ngelnghet leh ram hmasawnna (Decent Work and Economic Growth)
9. Thil siam chhuahna atana thil thar tha zawk leh hmasawnna ruhrel tha ruahman (Industry, Innovation and Infrastructure)
10. Intluklohna kar tih zim (Reduced Inequality)
11. Khawpui ngelnghet leh mipui himna (Sustainable Cities and Communities).
12. Neitu nihna rilru nena thil hman ral leh siamchhuah (Responsible Consumption and Production)
13. Sik leh sa danglam chak lutuk tur venna atana hmalak (Climate Action)
14. Tui hnuaia nungchate humhalh (Life below Water)
15. Leilung leh a chhunga chengte enkawl (Life on Land)
16. Remna leh muanna, dikna tungding tura dan leh inkaihhruaina tha ruahman (Peace, Justice and Strong Institutions)
17. Kan tum ram thleng tur a thawhhona tha neih (Partnerships for the Goals)