845/2023-2024

Mamit 19th June, 2023 : Er. Lalrinawma, Social Welfare & Tribal Affairs, Excise & Narcotics, Sericulture, Animal Husbandry & Veterinary Department changtu Minister chuan vawiin khan DC Conference Hall, Mamit-ah District Level Task Force on Ruihhlo Do Mamit District-te meeting a neihpui.

Minister chuan Meeting tura kalkhawm, Sawrkar Officials te, tlawmngaipawl aiawh leh khawtlang hruaitute chu ruihhlo dona kawnga an hmalakna te chu lawmawm a tih thu sawiin keimahni leh kan tu leh fate tan a ni tih hrereng chungin tha thlah lova ruihhlo do fan fan turin a chah.

Vawiin Meeting-ah hian VC, YMA, Police leh Excise te'n ruihhlo dona kawnga hma an lakna hrang hrangte report pe-in hmalak lehzelna turte sawiho zui nghal a ni a. Mamit District chhungah Detox Centre emaw Rehabilitation Centre a awm lo chu ngaihpawimawh a tul thu tarlan niin hmalak dan tur te sawiho nghal a ni.

Mamit District Level Task Force on Ruihhlo Do hi ruihhlo do kawngah chak lehzuala hmalak a nih theih nan Sub Hqrs. YMA te'n Anti Drug Squad an din a, Excise leh Police-te nen tang hovin checking neih thin a ni, Mamit District chhung khua/veng tinah Village Level Ruihhlo do committee din vek nise tih niin, ruihhlo dona atana hman turin Mamit khawpui chhung VC tinah CCTV wireless Camera pakhat theuh pek tura hmalak a ni. District Level Drug Disposal Committee, SP Mamit hova neihin a lo rel tawh angin, ruihhlo man khawmte hi Ni 26th June, 2023 International Day Against Drug Abuse and Illicit Trafficking denchhenin District Hospital, Mamit-a Incinerator-ah tihral tura ruahman a ni bawk.

Meeting-ah hian Mamit District Bawrhsap, SP Mamit, CMO, Asst. Commissioner E&N, khawtlang hruaitu leh tlawmngai pawl aiawhte bakah thutharthehdarhtute an tel a ni.