844/2023-2024

Mamit 19th June, 2023 : Er. Lalrinawma, Social Welfare & Tribal Affairs, Excise & Narcotics, Sericulture, Animal Husbandry & Veterinary Department changtu Minister chuan vawiin khan Mamit Hmar venga Observation Home chu khuallian niin a hawng.

Khuallian chuan Pathian anpui mihringte enkawl hna thawktu a Department enkawl SW&TA Staff te chu fakawm a tih thu sawiin tha taka an hna thawhte chhunzawm zelin turin a chah a. Naupangte chu tumah sualsa a piang an awm lova, an hun tawn leh enkawlna tha an dawn loh thin avanga humsual dai palh mai thin an nih thu sawiin kan fate an kalna tur awm kawngah naupang an nih lai atangin kaihruai ila, an tan nitin an hming lama tawngtaisak thin a pawimawh thu a sawi a. Nuin a fate a hum thin angin kan zavai mai hian kan khawtlanga naupangte leh hmeichhiate enkawl that leh humhim hi kan mawhphurhna a ni tih inhre thar turin kalkhawmte chu a chah bawk a ni.

Pi Sailopari, Deputy Director, Women & Child Development chuan Kum 2016 atanga din tan Observation Home-ah hian a dintirh atangin naupang 142 an awm tawh a. Naupang 139 chhuak tawhin tunah hian naupang 3 an la awm mek a. Kum 7 atanga 18 inkar naupang te awm theihna niin thla 4 an awm thin a. Thla 4 hnuah Special Home, Aizawl-ah sawn chhuah an nih thin thu leh tunah hian Superintendent hovin thawktu Staff 11 an awm mek thu a sawi. Home chu naupangte inhremna hmun ni lovin naupang humsual dai palhte siam thatna hmun, an chhuah hnuah pawh nunkawng dik an zawh zui zel theih nana an inzirna hmun a nih thu a sawi bawk.

Pu Lalthankima, Asst.Er. SW&TA chuan Technical Report pein Observation Home Executing Agency hi Women & Child Development, Social Welfare Department niin Main Building leh Superintendent Office a awm a. Estimate Amount hi 87,45,000/- niin April 2022 -ah sak hna tan a ni a, February, 2023-ah sak zawh a ni. A building zau zawng Main building leh Superintendent Office belhkhawm hi 282.02 sq.m a ni a. Khum 8 awm tura tih niin tunah hian mi pathum an khawsa mek a ni.

He hun hi Pi Flora Laltanpuii, DPO, Mamit-in kaihruaiin Pi C. Lalremruati, DCPO, Mamit chuan lawmthu a sawi a ni.

Minister hi Women & Child Development, Social Welfare & Tribal Affairs Department hotute bakah CEO, MSD&RB te'n an tawiawm a ni.