No.3210/2021-2022

Aizawl the 30th November, 2021: Vawiin khan Assembly Dy. Speaker Er. Lalrinawma, Tuikum Bialtu MLA ni bawk chuan a bial chhung Ngentiang khuaah Helipad hmun tur a en a. Pu Lalsangpuia, Civil Aviation Dy. Controller GAD in a tawiawm.

Er. Lalrinawma chuan tunlai khawvel changkang zelah intlawhpawhna tha zawk leh rang zawk mamawhna a sang zel a. Tin, rikrum thilah rang zawka intlawhpawhna hi kan mamawh thin hle bawk a. Chutiang atana tha tak Helicopter tumna tur Ngentiang khuain reilotea an nei thei tur chu lawmawm a tih thu sawiin, Ngentiang khaw tan mai nilovin a chhehvel khuate tan pawh a tangkai thei hle dawn a ni, a ti. Helipad siamna tur hi a bul tan nan MLA Fund atang thawh tan nghal a nih tur thu sawiin, mipuiten a tira tanga duat tak leh dim taka lo enkawl nghal turin a chah a ni.

Pu Lalsangpuia, Dy. Controller, Civil Aviation, GAD, pawhin thusawiin, Ngengtiang khuaa Helipad a awm theih nana bialtu MLA leh Dy. Speaker inpekna chu lawmawm a tih thu a sawi a. Hna thawh tur awm ang ang te pawh an tan nghal tur thu a tarlang a ni.

Pu Felix Vanlalfela, VCP, Ngentiang chuan, bialtu MLA in khawtlang mipui aiawh Joint Action Committee te ngenna rang taka a ngaihtuah sak chu lawmawm a tih thu sawiin, Er. Lalrinawma chu a bial mipuite tan MLA thawkrim leh chhuanawm tlinga a hriat thu a sawi a ni.