67/2023-2024 

Aizawl, 10th April, 2023 : Excise & Narcotics Minister Er. Lalrinawma'n vaeiin khan a pisa, MINECO-ah thuchah sawiin, ruihhlo dona kawngah Zoram mipuite  kan tanrual a ngaih takzet thu a sawi.

Er. Lalrinawma chuan tunhnaia Zombie Drug, Fentanyl leh tunlai ruihlo (New Psycho Active substance-NPS) khawthlang ram ten an buaipui em em thinin  Mizoram lo lut tawh ni a sawi leh mizo thalaite zingah a hmang sual an awm ni a sawi chu Excise & Narcotics Department chuan rang taka chhuiin a zir chiang nghal tih sawiin, he thu thang hi a diklo a ni tih Ni.6.4.2023(Ningani) khan  finfiah nghal a ni, a ti a. Tunhnaia Social Media-a video clip pakhat a mi pahnih lo lang ten Fentanyl an rui ni a ngaih theih tur a sawi awm chu zir chiangin, anmahni ngei pawh kawm an ni a. Anni chuan he damdawi Fentanyl hi a hming pawh an la hriat ngai loh thu leh a hmuh pawh an la hmuh ngai loh thu an sawi a, hemi ni (video-a lak an nih ni) hian Heroin leh drugs dang chi 3, tualchhunga hmuh mai theih chawhpawlhin an rui tih an sawi.

Minister chuan Social Welfare & Tribal Affairs Department, Government of Mizoram hnuaia ruihhlo leh a kaihhnawi chungchanga hmalakna sawi telin  MSD&RB hi State  Level Coordinating Agency(SLCA) atan Ministry of Social Justice & Empowerment (MoSJE), Government of India in a thlan thute, Zirna in leh thawktute ah pawh zirtirna inpek thlengin thawhho a nih thu a sawi a ni.  De-addiction Centre 11(Sawmpakhat) ah April, 2022-March, 2023 chhung hian mi 1,006 enkawl an ni a, Counselling vawi 16,920 pek an ni a, kan thalai duhawm tak tak ten ruihhlo vang hian mual min liam san a, tam tak ramtuileilo enkawl ngaiin an awm reng bawk a, hengte avang hian ruihhlo la ti ve lote vennhimna atan Mizoram Defence & Rehabilitation Board (MSD&RB), Social Welfare & Tribal Affairs Department nen naupangte an kum mila zir tur 'Modules on Prevention of drug use' buatsaih in DIET Lecturer 24 chu training pek tawh an ni a ti a. DIET lecturer te hian District hrang hrang a High School leh Higher Secondary school a zirtirtu mi 245 te hnenah zirtirna na pe chhawng leh tawh in, heng te hian anmahni school theuhah zirtirna an kalpui mek a ti a, hemi rual hian Kum 10 -17 inkar naupangte ruihlo chungchanga zirchianna 'Drug and Children Survey in Mizoram 2022' neih a nih thu sawi bawk a. Ruihhlo dona atana committee lo awm tawh sa chu Chief Minister Pu Zoramthanga hmalakna in thar thawh leh a ni a, he Ruihhlo Do Committee in chak zawka hma a lak theih nan Chief Minister,  Finance Minister ni bawk chuan cheng vaibelchhe 3 hman min phal sak a, tunah pawisa hi sanctioned tawh a ni, a ti bawk. He committee hian Supply reduction, Demand reduction leh Harm reduction chak zawka kalpui tumin Mizoram pumah hma a la mek tih sawiin, District tinah Deputy Commissioner chairman na hnuaiah District Level Task Force din a ni a, anni kaltlang hian District leh Village level ah ruihhlo dona kawngah hma chak taka lak an tum a nih thu a sawi a. Sorkar department hrang hrang leh Tlawmngai Pawl hrang hrang – Home Dept., Excise & Narcotics Dept., Social Welfare & Tribal Affairs Dept., Health & Family Welfare Dept, CYMA, YLA, MTP leh MSACS te an tel tih Minister hian a sawi a ni.

Er.Lalrinawma chuan Mizoram mipuite'n ruihhlo dona kawngah mit leh beng kan chhi tlang zel chu  thil lawmawm tak a ni a ti a. Ruihhlo dona kawnga tha thawhtute tha tichak a, a tulna apianga tawiawm zel turin Mizoram mipuite a chah thar leh a. Chutih rualin, thil a nihna tak hre chiang hmasa lo a mipui ti chiai thei zawng a thu thehdarh mai lo a, a zir chiang theitu leh hma la theitute hriattir hmasa zel turin mipuite a ngen bawk a ni.