1053/2023-2024

Dated Serchhip, the 6^th July, 2023:   Vawiin khan Er. Lalrinawma, Minister, AH & Vety, etc., chuan Tlungvel Venghlun Branch MHIP-in MHIP Day vawi-49 na Tlungvel Venghlun YMA Hall-a an hman chu  khuallian niin a hmanpui.

Er. Lalrinawma chuan, Mizo hmeichhiaten an ngaihsan leh an ngaihhlut ten kan nunah nasa takin nghawng a neih thin a, chuvang chuan ngaihsan tur dik kan ngaihsan a pawimawh hle a ni.  Chhungkua, ram leh hnam hmasawnna kawngah in pawimawh em em a ni. Zirna hmasa ber chu chhungkua a ni a, chhungkua enkawlna mawhphurtu pawimawh ber chu nu te hi an ni. Nu, fanau tha tak tak enkawl puitlingtute ngei hi ram tana mi tangkai leh pawimawh tak tak min petu, khawtlang leh kohhran tana mi hlu tak tak min pe tute an ni, tiin nute hlutzia a hrilh a. Zirna hi chhungkua atanga intan a nih avangin hriselna te, nun dan mawi te, mi rintlak leh hmantlak ni tura thangtharte buatsaihna hmun ril ber chu chhungkua hi a ni a, chu chhungkuaa mi pawimawh ber chu nu te hi in ni, a ti. Sawrkarin hmeichhiate venhimna dan tha tak tak a siam tih hrilhin, inneih inthen thuah pawh Mizo hnam dan fel tak kan nei a, ka zavaia kan hriatchian pawh a tha hle a ni. Sawrkarin hmeichhiate leh MHIP te pawimawhzia a hria a, MHIP Day pawh chawlhah a puang hial a ni, a ti bawk. Minister hian,  ruihlovin nasa takin kan thalaite a run mek avangin a dona kawnga theihtawp chhuahpuiah MHIP te a sawm a, Mizoten kan tawng leh kan hnam ziarang kan hloh telh telh nia a hriat thu sawiin hnam nunphung leh ziarangte chawi nung zawng leh mi hmasate chawimawi thiama mahni hnam thil ngaihsan inzirtir zel a duh thu pawh a sawi a ni.

Tlungvel Branch hi MHIP Thingsul Block huam chhunga awm niin an block ah hian Branch 14 an awm a. Branch tinten mahni remchan danin kumin Day hi an hmang thin a ni. Tlungvel Venghlun Branch ah hian members 355 awmin kumin chhungin member thi mi pathum(3) an nei tawh a, vawiin hian chung hote sunna hun chu an nei nghal a ni. 

Day hmanna inkhawm hi Pi Zothantluangi, President in a kaihruai a,khawtlang aiawh in VCP Pu H. Lalhumliana'n thu a sawi a, Pi C. Lalrampari'n hunserh a hmang a ni.